गजनी (अफगानिस्तान) – अफगानिस्तानको पूर्वीप्रान्त गजनीको खोगीआनी जिल्लामा तालिबानको आक्रमणमा परी कम्तीमा ४ प्रहरी अधिकारीको मृत्यु भएको छ । 

बिहीबार भएको आक्रमणमा परी जिल्लाका प्रहरी प्रमुखसहित ४ अधिकारीको मृत्यु भएको बताइएको छ । स्थानीय अधिकारीले सो जानकारी दिएका छन् । अफगानिस्तानमा सन् २०१५ को जनवरीबाट अफगानिस्तानको सुरक्षाको जिम्मा सबै अफगान सुरक्षाबलको काँधमा आएको छ । पछिल्लो समयमा अफगान सुरक्षा बलको हताहत संख्या बढेको छ । 

सन् २०१४ को डिसेम्बरबाट नेटोआवद्ध र अमेरिकी सेनाले अफगान युद्ध समाप्त भएको घोषणा गर्दै प्रायःसबै सेना त्यहाँबाट फर्किएका थिए । थोरै संख्यामा त्यहाँ बाँकी रहेका नेटोआवद्ध र अमेरिकी सेनाले पनि आतंककारीले जारी राखेको द्वन्द्वमा युद्धभूमिमा गएर युद्ध नगर्ने घोषणा गरे । 

यद्यपि, अफगानिस्तानमा बाँकी रहेका केही सेना अफगान सुरक्षाबललाई तालिम र सरसल्लाह दिने कार्य संलग्न रहेका छन् । त्यसैगरी, अफगानिस्तानको पूर्वी प्रान्त नान्गाहारको प्रान्तीय राजधानी जलालाबादमा अफगान सुरक्षाबलको सवारीसाधनलक्षित १ आत्मघाती आक्रमणमा परी कम्तीमा १० व्यक्तिकोे मृत्यु भएको छ । 

आक्रमणमा मारिएका व्यक्तिमा प्रायः सर्वसाधारण रहेको अधिकारीले जानकारी दिएका छन् । यसलाई अफगानिस्तानमा भएका पछिल्लो भीषण आक्रमणको रुपमा लिइएको छ । मारिएका ८ व्यक्ति सर्वसाधारण नै भएको पनि अधिकारीले जनाएका छन् । नान्गाहार प्रान्तको प्रान्तीय राजधानी जलालाबादमा तालिबान आतंककारी समूहले बारम्बार आक्रमण गरेको छ ।