अमेरिकाले पक्राउ ग–यो रुसी महिला जासूस

साउन १, २०७५

काठमाडौं – अमेरिकी सरकारले एक रुसी युवतीलाई रुस सरकारको एजेन्टका रूपमा राजनीतिक समूहहरूमा पस्ने षड्यन्त्र गरेको आरोपमा पक्राउ गरेको छ । अमेरिकी सञ्चारमाध्यमका अनुसार, मारिया बूटीना नामक यी महिलाले रिपब्लिकन पार्टीसँग निकट सम्बन्ध बनाएकी थिइन् र बन्दूक बोक्न पाउने अधिकारको वकालत गरिरहेकी थिइन् । 

फिनल्यान्डको राजधानी हेल्सिन्कीमा अमेरिकी राष्ट्रपति डोनल्ड ट्रम्प र रुसका राष्ट्रपति भ्लादिमिर पुटिनबीच भेटवार्ताको केही समयपछि नै मारिया पक्राउ परेको खबर आएको हो । 

मारियाले रुस सरकारका उच्च अधिकारीहरूको निर्देशनमा काम गरेको बताइएको छ । उनी वाशिङटनमा बस्छिन् । डिपार्टमेन्ट अफ जस्टिसले जारी गरेको बयानअनुसार बुधवार उनको मुद्दामा सुनुवाइ हुनेछ र त्यतिखेरसम्म उनी हिरासतमा हुनेछिन् । 

एफबीआईका स्पेसल एजेन्ट केभिन हेल्सनले सोमवार जारी गरेको बयानमा मारियालाई रुसी संघको हित प्रवर्द्धन गर्नका लागि अमेरिकी राजनीतिमा प्रभाव राख्ने अमेरिकीहरूसँग निजी सम्बन्धको उपयोग गर्ने निर्देशन दिइएको थियो । 

अभियोजकहरूका अनुसार, मारियाले आफ्ना गतिविधिको जानकारी अमेरिकी सरकारलाई दिएकी थिइनन् जबकि फरेन एजेन्ट रजिस्ट्रेसन एक्टअन्तर्गत यसो गर्नु जरूरी हुन्छ । 

अमेरिकी सञ्चारमाध्यमहरूका अनुसार, मारियाले नेसनल राइफल एसोसिएसनसँग सम्बन्ध बढाएकी थिइन् । त्यो अमेरिकाको सबभन्दा शक्तिशाली गन लबी हो ।

मारिया मूलतः साइबेरियाली हुन् र उनले अमेरिकी विश्वविद्यालयमा पढ्नका लागि विद्यार्थी भिसामा आएकी थिइन् ।

एजेन्सी 
 

साउन १, २०७५ मा प्रकाशित

प्रतिक्रिया दिनुहोस