काठमाडौं – इंग्लिश क्लब म्यानचेस्टर सिटीका मिडफील्डर केभिन डी ब्रुइना घुँडामा चोट लागेका कारण केही समय मैदानबाहिर बस्नुपर्ने भएको छ । 

बुधवार अभ्यासका क्रममा डी ब्रुइनालाई चोट लागेको थियो । उनको स्वास्थ्यको पूर्ण मूल्यांकन आगामी केही दिनमा हुनेछ । तर अहिले नै उनी वैशाखीको सहारामा छन् ।

डी ब्रुइनानिकट स्रोतका अनुसार, उनी दुईदेखि तीन महिना मैदानबाहिरै रहनेछन् । 

उनको घुँडाको ल्याटरल लिगामेन्टमा चोट लागेको विश्वास गरिएको छ । यही हप्ताको अन्तिमसम्ममा थप सही निदान हुनेछ । 

बेल्जियमका यी खेलाडीलाई सन् २०१६ चोट लाग्दा नौ हप्तासम्म मैदानबाहिर बस्नुपरेको थियो । 

सिटीले आफ्नै अभ्यास मैदानमा डी ब्रुइनाको स्वास्थ्य परीक्षण गराइरहेको छ र बार्सिलोनामा रहेका डा रामोन कुगातकहाँ पनि उनलाई पठाउनेछ । कुगातले सिटीका घाइते खेलाडीको उपचार गर्ने गरेका छन् । 

डी ब्रुइना नहुँदा सिटीले प्रिमियर लीग उपाधि रक्षा गर्ने आशामा ठूलो झड्का लागेको छ । 

यी २७ वर्षीय खेलाडी सिटीको कीर्तिमानी अघिल्लो सीजनका सबभन्दा बढी प्रभावशाली खेलाडीमध्ये एक थिए । 

सिटीले समर ट्रान्सफर विन्डोमा अर्का मिडफील्डर भित्र्याउन सकेन । तर डी ब्रुइनाको चोट सोचेजति नै खराब भएर उनले आराम गर्नुपर्ने भएमा डेभिड सिल्भा, बर्नार्डो सिल्भा, इल्के गुन्दोआन र फिल फोडेन विकल्पका रूपमा रहेका
छन् ।

गोल डट्कमबाट