काठमाडौं – कुनै समय बैंक तथा वित्तीय संस्थाको शेयर खरिद गर्नुलाई ठूलो प्रतिष्ठाको विषय मानिन्थ्यो । सर्वसाधारण घण्टौं लाइन लागेर भएपनि शेयर खरिद गर्न आतुर हुन्थे । पछिल्लो समय निरन्तर ओरालो लागेको शेयर बजारका कारण ‘क’ वर्गका बैंक तथा वित्तीय संस्थाको शेयरसमेत घटेको छ । यसबाट पूराना लगानीकर्तालाई समस्यामा पारेको भएपनि नयाँ लगानीकर्तालाई भने अवसर प्रदान गरेको छ । 

नेपाल स्टक एक्सचेञ्जकाअनुसार नौ बैंक तथा वित्तीय संस्थाको शेयर आधारभूत मूल्यकै हाराहारीमा रहेको छ । शेयर बजारमा लगानी गर्न चाहने नयाँ लगानीकर्ताका लागि यो सुखद समय भएपनि कारोवार गरिरहेका लगानीकर्तालाई भने बजार घटेका कारण समस्या भएको छ । घट्दो बजारका कारण ठूला बैंककै शेयर आधारभूत मूल्यकै तहमा आइपुग्दा नयाँ लगानीकर्तालाई लगानीको अवसर प्रदान गरेको छ । 

स्टककाअनुसार सेञ्चुरी बैंकको प्रतिशेयर मूल्य रु १६९ रहेको छ । गत वर्ष भदौ दोस्रो साता पनि सो बैंकको शेयर मूल्य रु २२७ रहेको थियो । यस्तै सिभिल बैंकको शेयर पनि घटेको छ । सो बैंकको प्रतिशेयर मूल्य रु १४८ रहेको छ । गत वर्ष भदौमा सो बैंकको शेयर रु २३० मा खरिद बिक्री भएको थियो । जनता बैंकको शेयर प्रतिकित्ता रु १५३ मा खरिद बिक्री भएको छ । गत बिहिबारको तथ्याङ्क अनुसार सो बैंकको शेयर निरन्तर ओरालो लाग्दै गएको छ । गत वर्ष भदौमा सो बैंकको शेयर रु २५४ मूल्यमा खरिद बिक्री भएको थियो ।

यस्तै मेगा बैंक लिमिटेडको शेयर रु १६१ मूल्यमा खरिद बिक्री भएको छ । गत वर्ष रु ४४९ मा कारोवार भएको सो बैंकको शेयर निरन्तर ओरालो लागेको छ । 

माछापुच्छ्रे बैंकको शेयर पनि दोस्रो बजारमा कमजोर देखिएको छ । सो बैंकको शेयर गत बिहिबार रु २०४ मा खरिद बिक्री भएको थियो । गत वर्ष भदौमा समेत सो बैंकको शेयर रु ३२७ कारोवार भएको थियो । शेयर बजारमा नेपाल बङ्गलादेश बैंक कमजोर देखिएको छ । सो बैंकको शेयर रु १९९ मा कारोवार भएको छ । गत वर्ष भदौमा सो बैंकको शेयर रु ३३२ मा खरिद बिक्री भएको थियो । एनसिसि बैंकको शेयर पनि ओरालो लागेको छ । सो बैंकको शेयर प्रतिकित्ता रु १८० मा बिक्री भएको थियो । गत वर्ष भदौमा रु ३६४ मा खरिद बिक्री भएको थियो । 

यस्तै प्रभु बैंकको शेयर प्रतिकित्ता रु १८० मा खरिद बिक्री भएको छ । गत वर्ष भदौमा रु ३७० मा कारोबार भएको थियो । सिटिजन बैंकको प्रतिकित्ता शेयर रु २३५, ग्लोबल आइएमइ बैंकको रु २९६, लक्ष्मी बैंकको रु २३३, बैंक अफ काठमाडौँको रु २८९, नेपाल बैंक लिमिटेडको रु २८६, एनएमबी बैंकको रु ३१६, प्राइम बैंकको रु २९५, सनराइज बैंकको रु २२०, एनआइसी एसिया बैंकको रु ३४० तथा सानिमा बैंकको प्रतिकित्ता शेयर रु ३२० मा कारोबार भएको छ । 

तीन बैंकको शेयर मात्रै बढी 

नेपाल स्टक एक्सचेञ्जमा सूचीकृत २७ वाणिज्य बैंकमध्ये तीन बैंकको शेयर मात्रै रु पाँच सय माथि रहेको छ । स्ट्याण्डर्ड चार्टड बैंकको प्रतिकित्ता शेयर रु ७१५ मा कारोबार भएको छ । गत वर्ष रु दुई हजार २०१ मा कारोवार भएको सो बैंकको शेयर मूल्य घट्दै गएको छ । नबिल बैंक लिमिटेडको प्रतिकित्ता शेयर रु ९४७ मा कारोबार भइरहेको छ । गत वर्ष सो बैंकको शेयर रु एक हजार ६६५ मा खरिद बिक्री भएको थियो । एभरेष्ट बैंक लिमिटेको शेयर मूल्य रु ६५८ रहेको छ । गत वर्ष रु एक हजार २६६ मा कारोवार भएको थियो । नेपाल एसबिआई बैंकको शेयर रु ४९३ मा कारोवार भएको छ । 

नयाँ लगानीकर्तालाई अवसर 

शेयर बजार विश्लेषक प्रकाश तिवारी सुरक्षित लगानी गर्न चाहनेलाई बैंक तथा वित्तीय संस्थाको शेयरमा लगानी गर्ने अवसर रहेको बताउँछन् । चाँडो फाइदा खोज्ने र थोरै लगानी गरेर धेरै नाफा खोज्नेलाई भने वित्तीय क्षेत्रभन्दा अन्य क्षेत्र नै उपयुक्त रहेको उनको भनाइ छ । सामान्यता बैंक तथा वित्तीय संस्थाको शेयरमा जोखिम कम हुने भएकाले पनि नागरिकको आर्कषण रहने गर्दछ । ‘वियरिस ट‍्रेन्ड’ मा रहेको बजारको प्रभाव सो क्षेत्रमा समेत परेको छ । विश्लेषक तिवारी ‘क’ वर्गका बैंक तथा वित्तीय संस्थाको शेयर आधरभूत मूल्यका हाराहारीमा रहनु नयाँ लगानीकर्ताका लागि अवसर हो, भन्छन् । रासस/रमेश लम्साल