काठमाडौं–महिला यौनकर्मीलाई परिचय पत्र दिएर रेड लाइट एरिया बनाउनु पर्ने गण्डकी प्रदेशका मुख्यमन्त्री पृथ्वी सुब्बा गुरुङको अभिव्यक्तिलाई लिएर केन्द्रीय संसदमा विरोध भएको छ ।

प्रतिनिधि सभाको आइतवार बसेको बैठकको विशेष समयमा राजपा सांसद चन्दा चौधरीले नैतिकताको आधारमा मुख्यमन्त्रीले राजीनामा दिनु पर्ने माग गरेकी हुन् ।  

ʻवेश्या बृत्तिलाई बैधानिकतादिने भन्ने मुख्यमन्त्रीको प्रस्तावले नारीको अपमान र राष्टको अपमान भएको छ । देशमा भइरहेको बलात्कार रोक्न नसक्ने सरकारका जिम्मेवार व्यक्तिबाट नारीमाथि यस्ता अभिव्यक्ति आउनु आपत्तिजनक छʼ सांसद चौधरीले भनिन्, ʻयस्ता अभिव्यक्ति दिने मुख्यमन्त्रीले नैतिकताका आधारमा राजीनामा दिनु पर्ने हो ।ʼ

उनले देशव्यापी भएका बलात्कारको घटनाको निन्दा गर्दै बलात्कारीलाई मृत्युदण्ड दिने कानून बनाउन माग गरिन । प्रहरीको हिरासतमा मृत्यु भएका राममनोहर यादवको मृत्यु सम्बन्धमा संसदीय छानविनको लागि माग गरिन् ।