काठमाडौं– अवकास प्राप्त वन अधिकृत बिनोद कुमार सिंहले सार्वजनिक पदमा रहँदा अवैध रुपमा सम्पत्ति आर्जन गरेको भन्दै विशेष अदालतमा भ्रष्टाचार मुद्दा दायर भएको छ । 

अख्तियार दुरुपयोग अनुसन्धान आयोगले गरेको छानबिनबाट सिंहले झन्डै २ करोड रुपैयाँ बराबरको सम्पत्ति अवैध रुपमा आर्जन गरेको देखिएको हो । 

अख्तियारले गरेको छानबिनबाट १३ फागुन २०४३ मा सार्वजनिक सेवामा प्रवेश गरेका सिंहले पारिवारिक व्यक्तिका नाममा बैंक खाता, शेयर लगानी, चल–अचल सम्पत्तिमा ३ करोड ५१ लाख ८२ हजार ४ सय ४४ रुपैयाँ ५१ पैसा खर्च गरेको देखिन्छ । जसमध्ये १ करोड ६० लाख २१ हजार १८ रुपैयाँ ८३ पैसा मात्रै वैध रुपमा आर्जन गरेको देखिएको अख्तियारले जनाएको छ । 

खर्च भएकोमध्ये १ करोड ९१ लाख ६१ हजार ६ सय २५ रुपैयाँ ६८ पैसाको स्रोत नभेटिएको अख्तियारले दावी गरेको छ । 

राजपत्राङ्कित तीतृय श्रेणी (शाखा अधिकृत) बाट अवकाश प्राप्त सिंहले अवैध रुपमा आर्जन गरेको १ करोड ९१ लाख ६१ हजार ६ सय २५ रुपैयाँ ६८ पैसा बराबर बिगो दावी गर्दै अख्तियारले सोमवार विशेष अदालतमा भ्रष्टाचार मुद्दा दायर गरेको हो । 

सिंहले आर्जन गरेको चल–अचल सम्पत्ति जफत गर्ने प्रयोजनका लागि उनीसहित श्रीमती गीतादेवी सिंह, छोराहरु अनुप कुमार सिंह, अचल कुमार सिंहसमेतलाई प्रतिवादी कायम गरिएको अख्तियारले जनाएको छ ।