काठमाडौं– पुस २५ गते दुई छोरासहित छाउगोठमै ज्यान गुमाएकी अम्बा बोहोराको घटनास्थिति बुझ्न सांसदको एक टोली बाजुरा जाने भएका छन् ।

संसदको महिला तथा सामाजिक समितिको विहीबारको बैठकले समितिका सदस्य गशेण सिंह ठगुन्नाको संयोजकत्वमा बाजुरा पठाउनको लागि ६ सदस्यीय टोली गठन गरेको छ ।

ठगुन्नाको टोली घटनाको अवस्था बुझ्न माघ १० गते बाजुरा जाँदैछ । टोलीले घटनाको बस्तुस्थिती, स्थानीय प्रशासनले गरेको काम कारवाही, छाउपडी प्रथा कायमै रहनुको कारण र त्यहाँको चेतनाको स्तरको अवस्थाबारे अवलोकन गर्नेछ । 

समितिको बैठकमा समितिकी सभापति निरुदेवी पालले छाउपडी प्रथा अन्त्य नहुँदासम्म तत्काल महिलाहरुको ज्यान बचाउनको लागि महिला बालबालिका तथा सामाजकल्याण मन्त्रालयमार्फत पहल गरिने बताएकी छन् ।

उनले छाउप्रथा अन्त्य नहुँदासम्मका लागि घरभित्रैसम्म भएपनि छुट्टै बस्ने व्यवस्था तत्काल गर्नुपर्ने आवश्यकता रहेको बताइन् ।

सरकारले २०६३ साल बैशाख ३६ गते नै छापउडी प्रथालाई कुरीति घोषणा गरेको थियो । मुलुकी अपराध संहिता ऐन, मा महिलाको रजस्वला वा सुत्केरी अवस्थामा छाउपडीमा राख्न वा त्यस्ता अन्य कुनै किसिमको भेदभाव, छुवाछुत वा अमानवीय व्यवहार गर्न नहुने उल्लेख छ । सरकारले छाउपडी प्रथा रहेको विभिन्न जिल्लाहरुमा छाउपडी प्रथा अन्त्यको लागि जनचेतनामूलक कार्यक्रमहरु समेत गर्दै आएको छ । 

छाउपडी प्रथा कानूनी रुपमा दण्डनीय भएपनि अछाम, डोटी र बाजुरामा छाउपडी प्रथा अझै पूर्ण रुपमा अन्त्य भइसकेको छैन । जसका कारण छाउगोठमा महिलाहरु अझै ज्यान गुमाइरहेका छन् ।