नुवाकोट – नयाँ शक्ति पार्टी नेपालका संयोजक डा. बाबुराम भट्टराईले चुनाव, पैसा र सत्ताको दुष्चक्रलाई नतोडेसम्म राजनीति असल नहुने बताएका छन् ।

जनसंवाद यात्राको १२ औं दिन नुवाकोटमा आयोजित अन्तक्र्रिया कार्यक्रममा डा. भट्टराईले पैसाको दुष्चक्र तोड्नुपर्ने बताएका हुन् ।

‘केही मुठ्ठीभर कमिशनखोरहरू छन् । उनीहरूको कुनै पार्टी हुँदैन । जो सत्तामा आउँछ त्यसैको पछि लाग्छन्,’ बिदुरमा आयोजित अन्तक्र्रियामा उनले भने, ‘कांग्रेस आए हाम्रा बाजे पनि कांग्रेसमा लाग्नुभएको थियो भन्छन् ।

कम्युनिस्ट आए मेरो त सबै कम्युनिस्ट हो भन्छन् । त्यही वर्गले नै भष्टाचार गर्छ र कमिशनबाट कमाएको अलिकति नेतालाई बुझाउँछ र साथीहरू त्यसैबाट चुनाव जित्नुहुन्छ र सत्तामा जानुहुन्छ ।’

दुष्चक्र नतोडिँदासम्म राजनीति शुद्ध नहुने उनले बताए । ‘यी मानिसलाई समातेर ठिगुरामा राख्ने हो भने र नेताहरूले पूरै अब हामी कसैको घुस खाँदैनौ, खुला र पारदर्शी हाम्रो जीवन छ भनेर सामान्य ढंगले हिँड्न थाल्ने हो भने सुध्रिन्छ,’ उनले भने ।

देश विकास गर्नका लागि हिजोको विचार र क्षमताले नपुग्ने देखेर नै आफूहरूले नयाँको बिउ रोपेको संयोजक भट्टराईले स्पष्ट पारे । ‘हामीले नयाँ बिउ रोपेका छौं र नेपाललाई समृद्ध र विससित बनाउनका लागि नयाँ अभियान सञ्चालन गरेका छौं । सक्नुहोला साथ दिनुहोला र नसकेमा बाटो नछेक्नुहोला,’ संयोजक भट्टराईले भने । 

देश बनाउन गोलीका छर्रामुनि हिँडेका मानिस नै सत्तामा पुगेपछि समेत भ्रष्टाचार बढ्नु चिन्ताको विषय भएको उनले बताए । ‘मुलुक रुपान्तरण गर्न ज्यानको बाजी राख्नेलाई कसरी खराब भन्ने ? सबैभन्दा बढी ज्यान जोखिममा हाल्ने माओवादी सत्तामा आएपछि पनि किन भ्रष्टाचार बढ्यो ?’ उनले भने, ‘गोलीका छर्रामुनि हिँडेका मानिस नै सत्तामा पुगेपछि भ्रष्टाचार बढ्नु राम्रो कुरा होइन ।’ 

नेताले देशको सम्पत्ति जनताको हो भनेर काम गरे मात्रै मुलुकलाई समृद्ध र विकसित बनाउन सकिने संयोजक भट्टराईले बताए । राजनीतिमा विकृति आउनुका कारण पहिचान गर्न डा. भट्टराईले आग्रह समेत गरे ।

‘हामीले व्यक्तिभन्दा पनि प्रवृत्तिलाई बुझ्नुपर्छ,’ उनले भने, ‘मान्छे मुलुतः निःस्वार्थी र सामाजिक प्राणी हो । तर विकास क्रमसँगै स्वार्थी लोभीपापी समेत हुन पुगेको छ ।’ आर्थिक, सामाजिक र राजनीतिक प्रणालीले नै मानिसले कस्तो व्यवहार गर्छ भन्ने कुरा निर्धारण गर्ने उनको तर्क थियो । 

‘नेता भनेका जनताका सेवक हुन् भन्ने सेवा भावबाट राजनीति निर्देशित भए मात्रै राजनीति सफा हुने तर्क समेत संयोजक भट्टराईले राखे । ‘नेता भनेका जनताका सेवक हुन्, त्यसैले सामाजिक प्रवृत्तिलाई बढावा दिने र लोभीपापी प्रवृत्तिलाई निरुत्साहित गर्नुपर्छ,’ उनले भने, ‘लोकतन्त्रमा हिजोका राजा महाराजाले जसरी शासकको रुपमा प्रस्तुत हुनुहुन्न । हरेक नेता–कार्यकर्ताले आफूलाई सेवकको रुपमा प्रस्तुत गर्नुपर्छ ।’ 

अधिकारसम्पन्न जनलोकपालको व्यवस्था गरेर मुलुकमा व्याप्त भ्रष्टाचार नियन्त्रण गर्न सकिने संयोजक भट्टराईले बताए । ‘लोकतन्त्र जति तल गयो त्यति नै राज्यको दमनकारी कमजोर हुन्छ र जनता अधिकारसम्पन्न हुन्छन्,’ उनले भने, ‘लोकतन्त्र जति तल जान्छ त्यति नै यो मजबुत हुन्छ र यसका लागि अधिकारी तल्लो तहलाई हस्तान्तरण गर्नुपर्छ ।’  

अहिलको विकासको गतिले नेपाल  छिटो समृद्ध हुन नसक्ने संयोजक भट्टराईले बताए । ‘अहिलेको विकासको गतिले समृद्ध हुन हामीलाई सय वर्ष लाग्छ, त्यसैले तीव्र विकासको आवश्यक पर्छ,’ उनले भने, ‘कम्तिमा पनि २ दशकसम्म प्रत्येक वर्ष २ अंकको आर्थिक विकास हुनुपर्छ ।’ यसका लागि बृहत् खालका राष्ट्रिय गौरवका आयोजना शुरू गर्नुपर्ने, कृषकलाई अनुदानको व्यवस्था गर्नुपर्ने, सबैलाई गुणस्तरीय शिक्षा प्रदान गर्नुपर्ने र छिमेकीसँग सन्तुलित सम्बन्ध कायम गर्नुपर्ने उनको भनाइ थियो ।