बाँके- आठौँ राष्ट्रिय खेलकूद प्रतियोगिताअन्तर्गत आज भएको हक्कीको पुरुषतर्फको फाइनल खेलमा त्रिभुवन आर्मी क्लबले उपाधि जितेको छ । 

नेपालगञ्जस्थित मङ्गलप्रसाद उच्चमाविको खेलमैदानमा भएको खेलमा नेपाल पुलिस क्लबलाई हराउँदै त्रिभुवन आर्मी क्लबले स्वर्ण जितेको हो । पेनाल्टीमा आर्मीले ४–१ गोलले पुलिस क्लबलाई पराजित गरेको हो । आर्मीका प्रदीप राजवंशीले ११औँ मिनेटमा गोल गरे भने खेलको ४७औँ मिनेटमा पुलिसका रोमन राणाले गोल फर्काए । 

यसैबीच आजदेखि शुरु भएको पुरुष क्रिकेटतर्फ प्रदेश ३ ले विजयी शुरुआत गरेको छ । कोहलपुरस्थित क्रिकेट मैदानमा कर्णाली प्रदेशलाई नौ रनले हराउँदै प्रदेश ३ विजयी भएको हो । टस हारेर ब्याटिङ गरेको प्रदेश ३ ले १९औँ ओभरमा सबै विकेट गुमाउँदै १२५ रन बनायो । उसका लागि शुभ कङ्साकारले सर्वाधिक ३९ रन जोडे । अदिल खान र सोनु देवकोटाले क्रमशः ३० र १३ रन बनाए । बलिङतर्फ कर्णाली प्रदेशका प्रकाश जैसीले पाँच विकेट लिए । दिनेश अधिकारीले एक विकेट लिए । एक सय २६ रनको लक्ष्य पाएको कर्णाली ११६ रनमै समेटियो । कर्णालीका लागि रवीन्द्रजङ्ग शाहीले चार चौकाको मद्दतमा सर्वाधिक ३५ रन बनाए । प्रकाश जैसीले २३ तथा टेक सलामी मगरले २२ रन बनाए । बलिङतर्फ प्रदेश ३ का नन्दन यादवले दुई तथा जितेन्द्र सिंह ठकुरी र सोनु तामाङले एक÷एक विकेट लिए । ‘प्लेयर अफ दी म्याच’ कर्णालीका प्रकाश जैसी घोषित भए ।

यस्तै आजै भएको दोस्रो खेलमा त्रिभुवन आर्मी क्लब विजयी भयो । आर्मीले प्रदेश २ लाई डकवर्थ–लुइस नियमअनुसार आठ विकेटले पराजित गरेको हो । निर्धारित २० ओभरको खेलमा प्रदेश २ ले १९ ओभर सकिँदा ६ विकेटको क्षतिमा ७४ रन बनाउँदा मौसम खराब भएपछि खेललाई १९ ओभरमा घटाइएको थियो । आर्मीले ७७ रनको लक्ष्य पाएको थियो । प्रदेश २ का मेहबुब आलमले २९ तथा राहुलप्रताप सिंहले १७ रन बनाए । बलिङतर्फ आर्मीका सुशन भारीले तीन विकेट, जितेन्द्र मुखियाले दुई र सोमपाल कामीले एक विकेट लिए । सतहत्तर रनको लक्ष्य पाएको आर्मीले १४ दशमलव ३ ओभरमै पुरा ग¥यो । कप्तान विनोद भण्डारीले ४२ तथा रामकृष्ण झाले ३३ रन बनाए । बलिङतर्फ सफुल्ला अन्सारीले दुई विकेट लिए । खेलको प्लेयर अफ दी म्याच आर्मीका सुशन भारी घोषित भए । बिहीबार कर्णाली प्रदेश र त्रिभुवन आर्मीबीच तथा प्रदेश १ र प्रदेश २ बीच हुनेछ ।