काठमाडौं – अमेरिकाका राष्ट्रपति डोनल्ड ट्रम्पले आफूलाई भारतका प्रधानमन्त्री नरेन्द्र मोदीले कश्मीर विवादमा मध्यस्थता गर्न भनेको भनी गरेको दाबीमा प्रश्न उठिरहेको छ ।

तर भारत सरकारले उनको यो दाबीको तत्कालै खण्डन गरेको थियो । 

ट्रम्पका आर्थिक सल्लाहकार ल्यारी कुडलोले राष्ट्रपतिको बचाउ गर्दै उनले कहिले पनि आफैं कुरा नबनाउने गरेको बताए । 

ह्वाइट हाउसमा पत्रकारहरूले कुडलोसँग ट्रम्पको दाबीका बारेमा सोध्दा उनले यो भद्दा प्रश्न भएको बताए । कुडलोले भने, ‘राष्ट्रपति आफैं कहिले पनि कुरा बनाउँदैनन् । यो गलत प्रश्न हो जस्तो लाग्छ । म यस विषयमा टिप्पणी गर्दिनँ । यो प्रश्न मेरो दायराभन्दा बाहिर छ । यसको उत्तर राष्ट्रिय सुरक्षा सल्लाहकार जोन बोल्टन र परराष्ट्रमन्त्री माइक पम्पिओले अनि राष्ट्रपति आफैंले मात्र दिन सक्छन् ।’

ट्रम्पले सोमवार इमरान खानसँगको पत्रकार सम्मेलनमा मोदीले आफूलाई दुई हप्ताअघि भेट्दा कश्मीर विवादमा मध्यस्थताको प्रस्ताव गरेको बताएका थिए । त्यसमा इमरानले प्रतिक्रिया दिँदै यसो गर्नुभयो भने अर्बौं मानिसले तपाईंलाई आशिष दिनेछन् भने । 

अमेरिकी सांसदहरूले समेत ट्रम्पको बयानको आलोचना गर्दै भारतले कश्मीर विवादमा तेस्रो पक्षको सहभागिता कहिल्यै नचाहेको बताएका थिए । तर ट्रम्पका आर्थिक सल्लाहकारले ट्रम्पले मनगढन्ते कुरा नगरेको भनेपछि मोदीले साँच्चिकै ट्रम्पसमक्ष प्रस्ताव राखेका हुन् कि भनी आशंका समेत बढेको छ ।

कांग्रेस नेता राहुल गान्धीले मोदीबाट ट्रम्पसमक्ष यस्तो प्रस्ताव गएको हो भने त्यो राष्ट्रघात भएको प्रतिक्रिया दिएका छन् ।

एजेन्सी