नेपाल भ्रमण वर्ष २०२० को पहिलो महिना (जनवरी) मा नेपाल आउने पर्यटकको संख्या अघिल्लो वर्षको तुलनामा घटेको पाइएको छ ।

तामझामका साथ भ्रमण वर्ष मनाउन शुरू गरिएको पहिलो महिना जनवरीमा विश्वका ३३ मुलुकबाट ७९ हजार ६ सय ८६ जना पर्यटक नेपाल भित्रिएका छन्, यो अघिल्लो वर्षको तुलनामा २ प्रतिशतले कम हो ।

अघिल्लो वर्ष यही अवधि अर्थात् सन् २०१९ को जनवरीमा विश्वका ३३ मुलुकबाट ८१ हजार २ सय ७३ जना पर्यटक नेपाल भित्रिएका थिए ।

पर्यटन बोर्डका सूचना अधिकारी मणि लामिछानेका अनुसार एसियाको तुलनामा युरोप र अमेरिकाबाट नेपाल आउने पर्यटकको संख्या घटेको छ ।

लोकान्तरलाई प्राप्त तथ्यांकअनुसार सन् २०१९ जनवरी महिनाको तुलनामा २०२० जनवरीमा एसियाका मुलुकहरूमध्ये चीन, बंगालादेश, म्यानमार, सिंगापुर, पाकिस्तान र मलेसियाबाट आउने पर्यटकको संख्या वृद्धि भएको छ ।

चीनमा कोरोना भाइरसको प्रकोप देखिएपनि चीनबाट नेपालमा आउने पर्यटको संख्या नघटेको तर त्यसको असरले युरोपियन र अमेरिकन देशबाट आउने पर्यटकलाई असर गरेको बोर्डका सूचना अधिकारी लामिछानेले बताए ।

‘सेप्टेम्बर, अक्टोबर र नोभेम्बर महिनामा हाम्रो विमानस्थल चौबीसै घण्टा चल्न नसक्दा १५ वटा जति अन्तर्राष्ट्रिय फ्लाइट क्यान्सिल भएका थिए, जसको असर पनि भ्रमण वर्षको शुरूआतमा परेको देखिन्छ,’ बोर्डका सूचना अधिकारी लामिछानेले भने ।

दशैं/तिहारतिर नेपालमा देखिएको डेंगुले पनि पर्यटक आगमनमा असर परेको उनको आंकलन छ ।

पर्यटक मात्रै बोक्ने जेट एयरवेजको नेपालमा उडान बन्द हुनु, कश्मीर प्रकरण र अक्टोबर/नोभेम्बरमा दिल्लीमा फैलिएको प्रदूषणजस्ता बाहिरी कारणले पनि नेपाल आउने पर्यटकको संख्या घटेको लामिछाने बताउँछन् ।

सन् २०१९ मा विश्वका विभिन्न देशबाट ११ लाख ९७ हजार १ सय १९ जना पर्यटक नेपाल आएका थिए, जसमा सबैभन्दा धेरै भारतबाट २ लाख ५४ हजार, चीनबाट १ लाख ६८ हजार र अमेरिकाबाट ९३ हजार पर्यटक भित्रिएको सरकारी तथ्यांक छ ।

सरकारले सन् २०२० लाई भ्रमण वर्ष घोषणा गरी २० लाख पर्यटक भित्र्याउने लक्ष्य राखेको छ । 

नेपालमा धेरै पर्यटक भित्रिने शीर्ष ३ मध्ये भारत र अमेरिकाबाट क्रमशः ४.४ र ३.१ प्रतिशत पर्यटक घटेका छन् ।

अघिल्लो महिनामा चीनबाट आउने पर्यटक नघटेको देखिएपनि फेब्रुअरीमा चिनियाँ पर्यटकको संख्या समेत शून्यप्राय: हुनसक्ने अवस्था छ ।