न्युजील्यान्डमा भएको दुई टेस्ट म्याच शृंखलाको दोस्रो खेलमा पनि भारतले लज्जास्पद पराजय बेहोरेको छ । यससँगै भारतलाई न्युजील्यान्डले ह्वाइटवाश गरेको छ । 

सोमवार सम्पन्न दोस्रो टेस्ट न्युजील्यान्डले सात विकेटले जितेको हो । 

यसअघि पाँच खेलको वानडे सिरिज पनि भारतले ५–० ले गुमाएको थियो ।

भारतको हारमा ब्याट्स्म्यानहरूको खराब प्रदर्शन मुख्य जिम्मेवार रह्यो । पहिलो पारीमा २४२ रन बनाएर न्युजील्यान्डलाई २३५ रनमै सीमित बनाएको भारतले सात रनको अग्रताबाट कुनै फाइदा उठाउन सकेन । दोस्रो पारीमा उसले जम्मा १२४ रन बनायो । अनि न्युजील्यान्डले सजिलै १३२ रन बनाएर खेल जित्यो । 

दोस्रो इनिङमा भारतका चार ब्याट्सम्यानले मात्र दोहोरो अंकमा रन बनाउन सके । सर्वाधिक स्कोर चेतेश्वर पुजाराको २४ रन रह्यो । 

भारतीय ब्याटिङ लाइनअपलाई ध्वस्त बनाउन न्युजील्यान्डका फास्ट बलर ट्रेन्ट बोल्टले चार विकेट लिए । अनि अर्का फास्ट बलर टिम साउथीको नाममा तीन विकेट रह्यो । 

पहिलो इनिङमा पनि भारतीय ब्याट्सम्यानहरूले काइल जेमीसनको बलिङलाई राम्रोसँग सामना गर्न सकेका थिएनन् । जेमीसनले पाँच विकेट लिएका थिए । 

म्याच सकिएपछि भारतीय कप्तान विराट कोहलीले आफूहरूको ब्याटिङ खराब रहेको र लगातार गल्तीहरू दोहोर्‍याएको बताए ।