नवगठित जनता समाजवादी पार्टीका नेता उपेन्द्र यादवले समाजवादी पार्टी फुटाउने तरखर गरेकी रेणु यादव पार्टीमै रहेको बताएका छन् ।

सरकारले आफ्नो पार्टी फुटाउने प्रयास गरेपनि त्यो सफल हुन नपाएको उनले बताए । 

बिहीवार निर्वाचन आयोगमा नयाँ दल दर्ताको लागि निवेदन दिएपछि पत्रकारसँग कुरा गर्दै यादवले रेणु यादव पार्टीमै रहेका बताए । ‘उहाँहरू पार्टीकै काममा हुनुहुन्छ । सबैजना यहाँ आएर जुलुस निकाल्नुपर्ने जरुरी छ र ?’ यादवले प्रतिप्रश्न गरे । 

समाजवादी पार्टी नेपाल र राष्ट्रिय जनता पार्टी (राजपा) एकीकरण गरेर बनेको नवगठित जनता समाजवादी पार्टीले नयाँ दल दर्ताका लागि निर्वाचन आयोगमा दल दर्ता गरेको छ । बिहीवार आयोगमा पुगेर नेताहरूले पार्टी एकता प्रक्रियाबारे जानकारी गराएका हुन् । बुधवार भएको सहमति पत्रको प्रति उनीहरूले आयोगमा बुझाएका छन् । औपचारिक ‘डकुमेन्ट’ भने लकडाउनपछि दुवै दलको केन्द्रीय समिति बसेर जानकारी गराइने राजपाका महामन्त्री केशव झाले जानकारी दिए ।

निर्वाचन आयोगमा ११ बजेर १६ मिनेटमा दर्ताको निवेदन दिएको र दर्ता नम्बर १३८८ रहेको झाले बताए । आयोगलाई बुझाएको निवेदनमा शरतसिंह भण्डारी र उपेन्द्र यादवले हस्ताक्षर गरेका छन् ।