नेपाल कम्युनिस्ट पार्टी (नेकपा) उपाध्यक्ष वामदेव गौतमले कोभिड– १९ रोकथाम, नियन्त्रण र उपचारका लागि जिल्लामा आवश्यक सुरक्षा सामग्री उपलब्ध गराएका छन् ।

प्युठानका ९ वटै स्थानीय तहलाई १० लाख रुपैयाँ बराबरको स्वास्थ्य सामग्री बिहीवार हस्तान्तरण गरिएको छ । 

कोरोना भाइरस रोकथामका लागि नेकपा जिल्ला कमिटीमार्फत गौमुखी, झिमरुक र नौबहिनी गाउँपालिकाबाट वितरण शुरू गरिएको छ । 

पूर्व उपप्रधानमन्त्री गौतमले संकलन गरी पठाएका १० हजार थान मास्क, १ हजार बोतल सेनिटाइजर, १ हजार थान पञ्जा र २ हजार थान हेड क्याप शुक्रवारसम्म जिल्लाका ९ वटै पालिकालाई वितरण गरिने जिल्ला कमिटी अध्यक्ष तुल्सीराम शर्माले जानकारी दिए ।

नेता गौतमसँगै प्रदेश नम्बर ५ का प्रदेशसभा सदस्य कृष्णध्वज खड्काको पहलमा पीपीई, सेनिटाइजर र  मास्क संकलन गरी यसअघि नै वितरण गरिएको शर्माले जानकारी दिए । ‘जिल्ला पार्टीमार्फत एकद्वार प्रणालीका लागि स्थानीय तहलाई हस्तान्तरण गरेका छौं,’ अध्यक्ष शर्माले भने, ‘राजनीतिभन्दा माथि उठेर स्थानीय सरकारलाई एकताबद्ध भएर कोरोनाविरुद्ध उभिन सुझाएका छौं ।’

बुधवार प्रदेशसभा सदस्य कृष्णध्वज खड्का र नेपाल पत्रकार महासंघका केन्द्रीय सदस्य वसन्त गिरीको पहलमा बुधवार महासंघ प्यूठानलाई सुरक्षा सामग्री वितरण गरिसकिएको नेकपा प्युठानले जनाएको छ ।