परराष्ट्र मन्त्रालयले दक्षिण एसियाली क्षेत्रीय सहयोग संगठन (सार्क)लाई सक्रिय बनाउनका लागि प्रयत्न जारी रहेको जनाएको छ ।

राष्ट्रिय सभाको राष्ट्रिय सरोकार तथा समन्वय समितिको बैठकमा आइतवार उपस्थित परराष्ट्रसचिव भरतराज पौडेलले अध्यक्ष राष्ट्रको हैसियतले सार्कलाई सक्रिय बनाउन प्रयत्न गरिरहेको बताएका हुन् ।

सबै सदस्य राष्ट्रबीच सहमति जुट्न नसकेका कारण हालसम्म सार्कलाई सक्रिय बनाउन नसकिएको उनले बताए ।

‘सार्कमा हामी चेयर छौं । तर, प्रक्रियाहरू अगाडि बढेनन् भन्ने कुराहरू छन् । सबै एग्री नभएसम्म कुनै पनि चिज अघि बढ्दैन । बेसिकल्ली त्यही हुन नसकेर हो । सार्कमा अध्यक्ष राष्ट्रको भूमिका छुट्टै केही पनि हुँदैन । हामी त ८ वटामध्ये एउटा मात्रै हौं । त्यसकारणले गर्दा खेरी यसमा प्रयत्न भइराखेको छ । रिजल्ट आएको नदेखिएको हुनाले हामीलाई प्रगति नभएको जस्तो लागेको हो ।'

सार्कमा नेपाल, भारत, भुटान, बंगलादेश, माल्दिभ्स, पाकिस्तान, श्रीलंका र अफगानिस्तान सदस्य छन् । विशेष गरी भारत र पाकिस्तानबीचको तिक्तताका कारण सार्क निष्क्रिय छ ।

ती सबै सदस्य राष्ट्रको सहमतिमा मात्रै सार्कलाई सक्रिय बनाउन सकिने परराष्ट्र सचिव पौडेलको भनाइ छ ।

बैठकमा समितिकी सभापति दिलकुमारी रावल थापा 'पार्वती'ले सार्कलाई सक्रिय बनाउन सरकारले कस्तो पहल गरिरहेको छ भनी जिज्ञासा राखेकी थिइन् । 

सोही विषयमा जवाफ दिँदै परराष्ट्र सचिव पौडेलले सार्कका विषयमा भइरहेको पहलबारे जानकारी गराएका हुन् ।