आगामी साता एक जनासहित आगामी ३ महिनाभित्र नेपाल सरकारको विशिष्ट श्रेणीका ६ सचिवले अवकाश पाउँदैछन् । आगामी आर्थिक वर्ष २०८०/०८१ भित्र अवकाश पाउने सचिवको संख्या १९ छ ।

राष्ट्रिय किताबखाना (निजामती)बाट प्राप्त विवरणअनुसार २०८० असार २४ गते राष्ट्रिय तथ्यांक कार्यालयमा कार्यरत सचिव रामप्रसाद थपलियाले अवकाश पाउनेछन् । उनी प्रशासन सेवातर्फका सचिव हुन् ।

त्यसैगरी आगामी आर्थिक वर्ष २०८०/०८१ मा कानून, शहरी विकास, भूमि व्यवस्था, सहकारी तथा गरिबी निवारण, परराष्ट्र, युवा तथा खेलकुद, स्वास्थ्य तथा जनसंख्या, श्रमसहित विभिन्न मन्त्रालयदेखि आयोग तथा प्रदेशका प्रमुख सचिवहरूसम्म सेवा निवृत्त हुनेछन् । त्यसबाहेक सोही आर्थिक वर्षमा संघीय संसददेखि  महालेखा परीक्षक कार्यालय हुँदै महान्यायाधिवक्ता कार्यालय, सर्वोच्च अदालतसम्मका सचिव वा सो सरहका केही कर्मचारी सेवानिवृत्त हुँदैछन् ।​

आगामी आवमा सेवानिवृत्त हुने सचिवहरूको विवरण

कानून, न्याय तथा संसदीय मामिला मन्त्रालयका सचिव धनराज ज्ञवालीले २०८० साउन ५ गते अवकाश पाउनेछन् । उनी न्याय सेवा समूहका सचिव हुन् ।

२०८० साउन २३ गते  महालेखा परीक्षकको कार्यालयकी उप-महालेखा परीक्षक राममाया कुँवर २०८० साउन २३ गते सेवानिवृत्त हुनेछिन् । नेपाल लेखा परीक्षण सेवाको सचिव रहेकी कुँवर अहिले कार्यबाहक महालेखापरीक्षक समेत हुन् ।

त्यसैगरी कर्णाली प्रदेशका प्रमुख सचिव डा. गोपीकृष्ण खनाल २०८० भदौ ४ गते सेवानिवृत्त हुनेछन् ।

शहरी विकास मन्त्रालयका सचिव रविन्द्रनाथ श्रेष्ठ २०८० असोज ११ गते सेवानिवृत्त हुँदैछन् ।

नेपाल इन्जिनीयरिङ सेवाका सचिव श्रेष्ठ केही समयअघि मात्र शहरी विकास मन्त्रालयमा सरुवा भएका हुन् । त्यसअघि उनी राष्ट्रिय सतर्कता केन्द्रमा सचिव थिए ।

संघीय संसद्मा कार्यरत सचिव पदमप्रसाद पाण्डेयले पनि २०८० असोज २१ गते अवकाश पाउनेछन् । उनी यसअघि महान्यायाधिवक्ता कार्यालयमा नायब महान्यायाधिवक्ताको रूपमा कार्यरत थिए ।

भूमि व्यवस्था, सहकारी तथा गरिबी निवारण मन्त्रालयका सचिव डा. दामोदर रेग्मी २०८० कात्तिक ११ गते सेवानिवृत्त हुनेछन् । उनी प्रशासन सेवाका सचिव हुन् ।

त्यसैगरी परराष्ट्र मन्त्रालयका सचिव भरतराज पौडेल २०८० मंसिर २० गते अवकाशमा जानेछन् । उनी परराष्ट्र सेवा समूहका सचिव हुन् ।

२०८० पुस ९ गते दुईजना सचिवहरू सेवानिवृत हुनेछन् । ऊर्जा, जलस्रोत तथा सिञ्चाई मन्त्रालयका ऊर्जा सचिव दिनेशकुमार घिमिरे २०८० पुस ९ गते सेवानिवृत्त हुनेछन् । उनी नेपाल इन्जिनीयरिङ सेवा समूहका सचिव हुन् ।

त्यसैगरी नेपाल न्याय सेवा, सरकारी वकिल समूहका सचिव नारायणप्रसाद पौडेलले पनि सोही दिन पुस ९ गते अवकाश पाउनेछन् ।

त्यसैगरी २०८० माघ १२ गते महालेखापरीक्षक कार्यालयका उप-महालेखापरीक्षक महेश्वर काफ्ले पनि सेवानिवृत्त हुनेछन् । उनी लेखा परीक्षण सेवाका सचिव हुन् ।

त्यसैगरी युवा तथा खेलकुद मन्त्रालयका सचिव सूर्यप्रसाद गौतमले २०८० फागुन ६ गते अवकाश पाउनेछन् । उनी पनि प्रशासन सेवाका सचिव हुन् ।

त्यसैगरी स्वास्थ्य तथा जनसंख्या मन्त्रालयकी सचिव देवकुमारी गुरागाईं पनि २०८० फागुन २६ गते सेवानिवृत्त हुनेछिन् । उनी जनसंख्या सचिव हुन् ।

त्यसैगरी श्रम, रोजगार तथा सामाजिक सुरक्षा मन्त्रालयका सचिव केवलप्रसाद भण्डारी २०८० चैत ११ गते सेवानिवृत्त हुनेछन् । त्यसअघि उनी राष्ट्रिय योजना आयोगमा सचिव थिए । उनले पहिलोपटक पाएको मन्त्रालय भने श्रम नै हो ।

त्यसैगरी २०८१ वैशाख १७ गते तीनजना सचिवहरू सेवानिवृत्त हुनेछन् ।  संस्कृति, पर्यटन तथा नागरिक उड्डयन मन्त्रालयका सचिव सुरेश अधिकारी २०८१ वैशाख १७ गते सेवानिवृत्त हुनेछन् ।

सर्वोच्च अदालतका रजिस्ट्रार नारायणप्रसाद पन्थी र महान्यायाधिवक्ता कार्यालयका नायब महान्यायाधिवक्ता विश्वराज कोइराला पनि सोही दिन २०८१ वैशाख १७ गते सेवानिवृत्त हुनेछन् ।

त्यसैगरी २०८१ वैशाख २८ गते कृषि तथा पशुपन्छी विकास मन्त्रालयका कृषि सचिव रेवतीरमण पौडेल पनि सेवानिवृत्त हुनेछन् । उनी प्रशासन सेवाका सचिव हुन् ।

त्यसैगरी जल तथा ऊर्जा आयोगका सचिव सुशीलचन्द्र तिवारी २०८१ असार १३ गते सेवानिवृत्त हुनेछन् । उनी इन्जिनीयरिङ सेवाका सचिव हुन् । सर्वोच्च अदालतका मुख्य रजिष्ट्रार लालबहादुर कुँवर २०८० माघ २९ गते सेवानिवृत्त हुनेछन् ।

अहिलेका सचिवहरूमध्ये सबै भन्दा बढी कार्यकाल सुदूरपश्चिम प्रदेशका प्रमुख सचिव नारायणप्रसाद शर्मा दुवाडीको छ । उनी २०८४ भदौ ६ गते सेवानिवृत हुनेछन् ।

उनीभन्दा अघि २०८४ साउन १९ गते कोशी प्रदेशका प्रमुख सचिव डा. दीपक काफ्ले र महालेखा परीक्षक कार्यालयकी उपमहालेखा परीक्षक बिन्दु विष्ट सेवानिवृत हुनेछन् ।

यी तीनैजना क्रमश: धेरै कार्यकाल बाँकी रहेका सचिव हुन् । 

हेर्नुहोस्, प्राप्त विवरण :