पछिल्लो समय सर्वाधिक रुचाइएकी गायिका समीक्षा अधिकारीको आवाजमा चर्चित पुरानो गीत ‘शिर सजाउने फूल’को फिमेल भर्सन सार्वजनिक गरिएको छ । 

सगरमाथा डिजिटलले गायक शिव परियारको आवाजमा रहेको यस गीतलाई गायिका अधिकारीको स्वरमा ’फिमेल भर्सन’ सार्वजनिक गरेको हो । 

करिब १० वर्ष अघि सगरमाथा डिजिटलले नै गायक परियारको स्वरमा यस गीतलाई बजारमा ल्याएको थियो । १० वर्षपछि गीतले बल्ल महिला आवाज पाएको हो ।

कर्ण चापागाईंको शब्द रचनामा रहेको यस गीतमा वसन्त सापकोटाले संगीत दिएका छन् । विगतमा पनि सापकोटाकै संगीतमा गायक परियारले गीत गाएका थिए ।

गायक परियारको स्वरमा यसअघि यस गीतले युट्युबमा १८ लाख ४२ हजार हाराहारीमा भ्युज पाएको थियो । गायिका अधिकारीको स्वरमा पनि गीत लोकप्रिय हुने निर्माण पक्षको भनाइ छ ।

गीतको एरेन्ज विशम सापकोटाले गरेका हुन् । अनिल के. मानन्धरको निर्देशन रहेको भिडियोमा गायिका अधिकारी नै देखिएकी छन् । 

सगरमाथा डिजिटल्सले यसअघि झरनाको चिसो पानी, हिउँचुलीमा घाम लगायतका कालजयी गीतहरू सार्वजनिक गरिसकेको छ । नयाँ गीत पनि विगतको गीत जस्तै दर्शक तथा श्रोताले रुचाउने कम्पनीको विश्वास छ ।

भिडियो :