तिहार सुरु भएसँगै विशेष गीतहरू गुन्जिन थालिसकेका छन् । सर्जकहरूले तिहारलक्षित गरेर बर्सेनि थुप्रै गीतहरू ल्याउँदै आएका छन् । यद्यपि, पुराना गीतहरूजस्तो लोकप्रियता नयाँले पाउन सकेका छैनन् । तिहारका केही सदाबहार गीत छन्, जुन हरेक वर्ष गुञ्जिँदै आएका छन् । तिहारका सदाबहार गीतमा चलचित्रका गीतहरूको वर्चश्व छ । 

तिहारको सबैभन्दा चर्चित गीत हो, ‘तिहारै आयो लौ झिलिमिली...’ । यो चलचित्र ‘स्वर्ग’मा समावेश गीत हो । यसको शब्द यादव खरेलले लेखेका हुन् । शम्भुजित बाँस्कोटाको संगीत रहेको गीतमा लोचन भट्टराई र नूतन प्रधानको स्वर छ । 

शम्भु प्रधानको निर्देशन रहेको ‘स्वर्ग’ २०५१ सालमा प्रदर्शनमा आएको हो । फिल्म सार्वजनिक भएको झण्डै ३ दशकसम्म पनि यसमा रहेको ‘तिहारै आयो...’उत्तिकै गुञ्जिने गरेको छ । तिहार नजिकिएसँगै यत्रतत्र–सर्वत्र यो गीत बज्न सुरु हुन्छ । यो गीत नगुञ्जिएसम्म तिहार आएको भान नै नहुने समेत कतिपय बताउँछन् ।

यसको भिडियोमा शिव श्रेष्ठ र गौरी मल्ल देखिएका छन् । नयाँ पुस्तामाझ समेत गीत चर्चित छ । युट्युबमा समेत गीतले निकै राम्रो भ्युज पाएको छ । तिहारको अर्को सदाबहार गीत हो, दियो बाली साँझको...। 

चलचित्र ‘चिनो’ मा समावेश यस गीतमा आशा भोस्लेले स्वर दिएकी छन् । कुशुम गजमेरको शब्द रचना, रञ्जित गजमेरको सङ्गीत सिर्जना रहेको गीतको भिडियोमा चलचित्रका अभिनेता स्वर्गीय केशव भट्टराई र अभिनेत्री स्वर्गीय शुभद्रा अधिकारीको अभिनय छ । निर्देशक तुलसी घिमिरेले चलचित्रको कथावस्तुअनुसार गीत तयार पारेका थिए । यो चलचित्र प्रदर्शनमा आएको तीन दशक भइसकेको छ, तर आजसम्म पनि ‘दियो बाली साँझको’ गीत हरेक तिहारमा सबैतिर गुञ्जिने गरेको छ । 

चलचित्र ‘विजय पराजय’ मा समावेश ‘निधारमा लर्काएर सप्तरंगी टीका...’ तिहारमा गुञ्जिने अर्को लोकप्रिय गीत हो । 

राजेन्द्र शुलभले निर्देशन गरेको यो चलचित्रको गीतमा दिनेश अधिकारीको शब्द, शम्भूजीत बास्कोटाको संगीत र बलिउड गायिका हेम लताको स्वर छ । यो चलचित्र पनि प्रदर्शनमा आएको ३ दशकभन्दा लामो समय भइसकेको छ । यद्यपि, हरेक तिहारमा यस गीत उत्तिकै घन्किने गरेको छ ।

पुरानामा तीन दशकभन्दा अगाडि प्रदर्शनमा आएको तुलसी घिमिरे निर्देशित चलचित्र ‘अन्याय’मा पनि तिहारसम्बन्धी गीत समावेश गरिएको छ । मनिला सोताङको स्वर रहेको ‘अधरमा आज उनकै छ गीत’ गीत आजपर्यन्त पनि चर्चित छ । यो गीतमा रत्नशमशेर थापाको शब्द एवं रञ्जित गजमेरको संगीत छ । यस्तै, अनिल संग्रौलाद्वारा निर्देशित चलचित्र ‘माइती’मा पनि तिहार सम्बन्धित गीत समावेश गरिएको छ । चलचित्रको ‘हाँसेर बोल बहिनी तिहारको बेलैमा’गीत पनि चर्चित मानिन्छ । चलचित्र ‘आफ्नो मान्छे’मा तीज र तिहार समेटेर ‘तीज र तिहार आउँदामा बहिनी’ बोलको गीत समावेश गरिएको छ भने चलचित्र ‘फिटकिरी’मा देउसिरे गीत समावेश छ । चलचित्र ‘पालेदाइ’मा ‘साइतको सप्तरंगी निधारमा खुल्न देऊ है’ बोलको तिहार गीत समावेश गरिएको छ । यो गीत पनि चर्चित छ । 

केही वर्षअगाडि प्रदर्शनमा आएको ‘कोहिनूर’मा समावेश ‘यसपालिको तिहारै रमाइलो...’ तिहारको अर्को चर्चित गीतका रुपमा अगाडि आएको छ । 

पछिल्लो समय चलचित्रमा समावेश तिहार गीतमध्ये यो गीत बढी रुचाइनेमा पर्छ । सुन्दर श्रेष्ठको शब्द, शम्भूजीत बास्कोटाको संगीत, प्रमोद खरेल र अञ्जु पन्तको स्वर छ । यसको भिडियोमा अभिनेता स्वर्गीय श्रीकृष्ण श्रेष्ठ र अभिनेत्री स्वेता खड्काको नृत्य छ । यस्तै, चलचित्र ‘परदेशी’मा पनि भैली गीत समावेश छ । उक्त गीत पनि तिहारमा बज्ने गर्छ । 

चलचित्र ‘बन्दी’मा पनि तिहारसम्बन्धी ‘भैलो खेलौं है भैलिनी हो’ गीत समावेश गरिएको छ ।

फिल्म बाहिरका चर्चित तिहार गीत
सुगम पोखरेलको स्वरमा रहेको ‘वर्षमा दिनैमा लै लै...’ पछिल्लो समयमा रुचाइएको दशैं तिहार गीत हो । त्यस्तै पछिल्ला वर्ष तिहारमा चर्चित अर्को गीत हो, ‘झिलिमिली रातमा..’ । 

राजु लामाको स्वर, शुक गुरुङको शब्द/संगीत रहेको ‘भाइटीकामा भेट्न आउँला’ गीत पनि तिहारमा धेरै घन्किने गीतमा पर्छ । तीन वर्षअघि मात्रै सार्वजनिक तिहार विशेष गीत ‘सप्तरंगी टीका’ पनि निकै रुचाइएको छ । 

दाजु बहिनीको सम्बन्धसँगै लाहुरेको कथा समेटिएको ‘दाइ त मेरो लाहुर जाने’ चर्चित दशैं–तिहार गीत हो । वर्षांै पुरानो यो गीत अहिले पनि चर्चित छ । ‘पैयुँ फुल्दा त्यो लेकलेक’ तिहारसँग जोडिएको विरहको कथामा बनेको लोकप्रिय गीत हो । ‘भैलेनी आयौँ आगँन गुनियाँ चोलिया मागन’, ‘आहै झिलिमिलि भिलिमिलि’लगायतका तिहार विशेष गीतहरू पनि स्रोता–दर्शकले निकै रुचाएका छन् ।

केही वर्षअघि सार्वजनिक ‘टिकामाला’बोलको गीत पनि रुचाइएको छ । रमेश बीजीको शब्द, बीबी अनुरागीको संगीत रहेको यो गीतमा रामकृष्ण ढकालको स्वर छ । दिदी र भाइबीचको सम्बन्धलाई तिहारसँग जोडेर मार्मिक रुपमा तयार पारिएको छ । टंक बुढाथोकीको ‘ए भन भन भाइ हो...’पनि तिहारमा बज्ने चर्चित गीतमध्येमा पर्छ ।  यीबाहेक अन्य थुप्रै कलाकारका तिहार गीत पनि स्रोता/दर्शकले रुचाएका छन् ।