‘जेरी’ उपनामले परिचित लोकदोहोरी गायिका बबिता बानियाँले ठमेलमा दोहोरी साँझ खोलेकी छन् । 

नर्सिङ चोकमा उनले संचालनमा ल्याएको ‘मनको चाहना रोधी घर’को बिहीवार बेलुका औपचारिक उद्घाटन भएको छ । यो दोहोरी साँझमा ‘जेरी’सहित गायक कमल विष्टलगायतको लगानी छ । 

‘अहिलेसम्म जे जति कमाएको छु । अरूलाई झै घर जोडौँ, जग्गा–जमिन जोडौँ, गाडी जोडौँ भन्ने भएन’ गायिका जेरीले भनिन् ‘बरु रोधी खोलेर आफूजस्तै श्रम गरेर खानेहरूको रोजीरोटीको बाटो बन्न सकौँ भन्ने लागिरहन्थ्यो । अहिले ५२–५३ जनाले यहाँ रोजगारी गरिरहनुभएको छ ।’
दोहोरी साँझमा झन्डै डेढ करोड लगानी लागेको उनको सुनाइन् । 

गायिका ‘जेरी’ले अहिले उद्घाटन गर्न लागिए पनि चार महिना अगाडिदेखि दोहोरी साँझ संचालनमा रहेको जानकारी दिइन् । 

चर्चित कलाकारहरूका साथ बिहीवारदेखि १५ गते सोमवारसम्म उद्घाटन विशेष कार्यक्रम राखिएको छ । जहाँ राष्ट्रिय लोक तथा दोहोरीगीत प्रतिष्ठानकी अध्यक्ष रीता थापा, वरिष्ठ गायक एवं संगीतकार नारायण रायमाझी, इन्द्रेणी कार्यक्रममा संचालक कृष्ण कंडेललगायत सहभागी हुँदै छन् ।