गायिका एलिना चौहानको पछिल्लो गीत ‘कट्टा हान्दिन्छु’ युट्युब ट्रेन्डिङको शीर्षस्थानमा परेको छ । 

६ दिनअघि सार्वजनिक गीत राम्रो भ्युज पाउँदै युट्युबमा संगीततर्फ ट्रेन्डिङको पहिलो नम्बरमा परेको हो । यो गीतमा एलिनासँगै चर्चित गायक खेम सेञ्चुरीको स्वर छ । यद्यपि, गीतमा एलिनाको तुलनामा खेम छायाँमा छन् । 

यस गीतका शब्द नेत्र अर्यालले लेखेका हुन् । गीतमा गायक खेमकै संगीत छ भने एचबिएन किस्मतले यसको एरेन्ज गरेका हुन् । 

रामजी लामिछानेको कोरियोग्राफी एवं निर्देशनमा तयार भिडियोमा आश्मा विश्वकर्मा र ओबी रायमाझीको मोडलिङ छ । 

आश्माको नृत्यलाई लिएर पनि यतिबेला बजारमा निकै चर्चा भइरहेको छ । प्रकाश भण्डारी निर्माता रहेको गीत मोडल ओबी रायमाझीको युट्युब च्यानलमार्फत सार्वजनिक भएको हो ।

गीतलाई आइतवार बेलुकासम्म १५ लाख हाराहारीले हेरेका छन् ।