सरकारको नेतृत्वकर्ता दल नेकपा (माओवादी केन्द्र)का उपाध्यक्ष कृष्णबहादुर महरालगायत प्रहरीको निगरानीमा छन् । सुन तस्करी सम्बन्धमा गठित छानबिन आयोगले कारबाही गर्न सिफारिस गरेका महरा प्रहरीको उच्च निगरानीमा परेका हुन् ।

प्रहरी स्रोतका अनुसार महरा आज रूपन्देही पुगेका छन् । जिल्लामा महरा आएको थाहा पाएपछि रूपन्देही प्रहरीले निगरानी बढाएको हो । रूपन्देही प्रहरी प्रमुख एसपी रन्जित राठोरले महरालाई निगरानीमा राखेको बताए । 'उहाँ(महरा) यहाँ आएको जानकारी आएको छ । हामीले वाच गरिरहेका छौं,' एसपी राठोरले लोकान्तरसँग भने । 

उच्च अदालतका पूर्व न्यायाधीश डिल्लीराज आचार्य संयोजकत्वको आयोगले पूर्व सभामुख महरा दोषी रहेको ठहर गरेको थियो । चैत १ गते बिहीबार आयोगले गृहमन्त्री रवि लामिछानेलाई प्रतिवेदन बुझाएको थियो । 

महरा लगायतलाई तत्काल कारबाही गर्नुपर्ने, सरकारी कर्मचारीलाई विभागीय कारबाही र केही व्यक्तिलाई निगरानीमा राख्न सिफारिश गरिएको छ । 

आयोगले दोषी ठहर गरेकाहरू भाग्ने आशंकामा प्रहरीले बिहीबारदेखि नै विशेष निगरानी गरिरहेको सुरक्षा स्रोतले जानकारी दियो । ‘सुन तस्करीमा जोडिएकाहरू नभागुन् भनेर बिहीबारदेखि प्रहरीलाई अलर्ट राखिएको छ’ गृह स्रोतले लोकान्तरसँग भन्यो, 'आयोगले डामेका सबै निगरानीमा छन्, जुनसुकै बेला पक्राउ पर्न सक्छन् ।’ 

यसअघि उपप्रधान एवं गृहमन्त्री रवि लामिछानेले सुन तस्करी प्रकरणमा छानबिन आयोगले कारबाही सिफारिस गरेका कृष्णबहादुर महरामाथि तत्काल कारबाही थाल्न प्रहरीलाई निर्देशन दिएका थिए ।

प्रहरी महानिरीक्षक वसन्त कुँवर, प्रहरीको केन्द्रीय अनुसन्धान ब्यूरो (सीआईबी) प्रमुख श्यामलाल ज्ञवाली लगायतलाई आइतबार गृह मन्त्रालयमा निर्देशन दिँदै उनले कारबाही थाल्न निर्देशन दिएका हुन् ।

उच्च अदालतका न्यायाधीश डिल्लीराज आचार्य संयोजकत्वको आयोगले बिहीबार सरकारलाई प्रतिवेदन बुझाएको थियो । प्रतिवेदन प्राप्त गरेलगत्तै गृहमन्त्री लामिछानेले शुक्रवारदेखि प्रतिवेदन कार्यान्वयन शुरू गरेका थिए ।