कान्ति बाल अस्पताललाई बागलुङकी एक बालिकाको उपचारमा बेवास्ता गरेको आरोप लागेको छ ।

बुटवल र चितवनमा उपचार सम्भव नभएपछि कान्तिमा रिफर गरिएकी ७ वर्षीया बालिकाको स्वास्थ्य अवस्था नाजुक हुँदा पनि चिकित्सकहरूले बेवास्ता गरेको आरोप बालिकाको उपचारमा सहयोग पुर्याएका सञ्चारकर्मी राजु सुवेदीले बताएका छन् ।

तुरुन्तै भेन्टिलेटर चाहिने बिरामीलाई अस्पतालले भर्ना नलिएर अन्तै लैजानुस् भनेपछि बेडमा त्यसै छाडिदिएकी बिरामी बालिकाको अवस्था झन्–झन् नाजुक बनेको सुवेदीले सामाजिक सञ्जाल फेसबुकमार्फत जानकारी दिएका छन् ।

बिरामीलाई हेरिदिन भनेर अनुनय–विनय गर्दा पनि सरकारी अस्पतालका चिकित्सकले बेवास्ता गरेपछि बिरामीलाई कान्तिबाट फर्काएर एउटा निजी अस्पतालमा लगेको उनको भनाइ छ ।

आफूलाई अस्पतालकै एकजना जुनियर कर्मचारीबाट एउटा आईसीयू खाली भएको सूचना प्राप्त भएको र आफ्नो ठाउँबाट केही उपाय नलागेपछि सांसद देवेन्द्र पौडेलसहित बागलुङका ९ जना नेतालाई फोन गरेको सुवेदीले बताएका छन् । तर फोन नउठेका कारण पावर लगाउनबाट पनि बञ्चित भएको उनले बताएका छन् ।  

शक्तिमा पहुँच कमजोर हुँदा छटपटाइरहेको बिरामी अहिले सरकारीबाट फर्काएर एउटा निजी अस्पतालमा लैजानु पर्दो रहेछ भन्दै सुवेदीले फेसबूकमा मार्मिक स्टाटस लेखेका हुन्।

‘सोचिरहेको छु – पहुँच नहुनेले यो देशमा पाउने सुविधा भनेको मतदान मात्रै हो,’ उनले लेखेका छन् ।

यस्तो छ सुवेदीको गुनासोः 

कान्ति बाल अस्पतालको १ः४० बज्यो ! 

म कान्ति बाल अस्पतालमा छु । 

सोमवार राति ११ः४० मा एउटा कल आयो । सेभ नभएको नम्बरबाट कल गर्नेले भन्नुभयो, ‘बागलुङको निसीखोलाबाट ल्याएकी ७ वर्षकी छोरी सिकिस्त छिन् । बुटवलबाट चितवन ल्याएको चितवनले कान्तिमा रिफर गर्यो । र, यहाँ ल्याएको यहाँ कसैले हेरिदिएन । हामीलाई अप्ठ्यारो पर्यौँ । मैले उहाँहरू फोन राखेर कान्तिमा फोन गरेँ । तर, उठेन । चिनेका सोही अस्पतालमा रहेका एकजना डाक्टरलाई फोन गरेँ । उनको पनि फोन स्वीच अफ रहेछ । रातको १२ बजिसकेको थियो । बिरामीको नजिकका उहाँकै फेरि फोन आयो । उहाँ हारगुहारको शैलीमा भन्दैहुनुहुन्थ्यो लौ न बचाइदिनुपर्यो । म तुरुन्तै गाडी निकालेर कान्ति पुगेँ । घरबाट ३० मिनेटमा अस्पताल पुग्दा बिरामीको अवस्था एकदमै नाजुक भइसकेको रहेछ । तुरुन्तै भेन्टिलेटर चाहिने बिरामीलाई अस्पतालले भर्ना नलिने अन्तै लैजानुस् भनेपछि बेडमा त्यसै छाडिदिएकी बिरामी झन् पछि झन् नाजुक बनेको देखे ।

अस्पतालले बिरामीको परिवारको हारगुहारलाई नसुनेर बाहिरै लैजान भनिरहेको र बिरामीको अवस्था झन् नाजुक भएर छटपटाइरहेको दृश्य कारुणिक थियो । मैले पनि त्यहाँका रहेका डाक्टरलाई बचाइदिनुहोस् भनेर अनुनय–विनय गरेँ । तर, उनीहरू यति निर्दयी बनेर उभिए कि मैले मान्छे यस्तोसम्म हुन्छ भन्ने कल्पनासमेत गरेको थिइनँ । मलाई अस्पतालकै एकजना जुनियर कर्मचारीबाट एउटा आईसीयू खाली भएको सूचना प्राप्त भएको थियो । सोही बेड छटपटाइरहेको त्यो बिरामीको प्राण जोगाउन पर्याप्त थियो भन्ने बुझाइसहित पहल गरिदिन मैले आग्रह गरेँ ।

मेरो ठाउँबाट त्यो उपाय नलागेपछि सांसद देवेन्द्र पौडेलसहित ९ जना बागलुङका नेतालाई फोन गरे । तर, रात छिप्पिएकाले पनि होला कसैको फोन उठेन । शक्तिमा पहुँच कमजोर हुँदा छटपटाइरहेको बिरामी अहिले कान्तिबाट फर्काएर एउटा निजी अस्पतालमा लैजाँदै छौ । सोचिरहेको छु ‘पहुँच नहुनेले यो देशमा पाउने सुविधा भनेको मतदान मात्रै हो ।’ कामना गरौं ।

यसैबीच, यस घटनालाई लिएर द एसोसिएन अफ क्लिनिकल प्याथोलोजिस्ट अफ नेपाल (एसीपीएन)सँग नेपाल चिकित्सक संघले बैठक गरेको छ । यस्ता समाधान कसरी गर्ने भन्ने विषयमा बैठक बसेको हो ।

यता कान्ति अस्पतालले भने आईसीयूमा बेड हुदाँहुँदै बिरामी निजी अस्पतालमा लैजानु परेको एवं चिकित्सक निर्दयी भएको भनी सामाजिक सञ्जालमा प्रेसित विषयप्रति गम्भीर ध्यानाकर्षण भएको जनाएको छ । उसले आरोपको खण्डन गरेको छ ।