काठमाडौं –उपप्रधान एवं स्वास्थ्य तथा जनसंख्या मन्त्री उपेन्द्र यादवका सल्लाहकारहरूले समेत मन्त्रालयबाट सवारी सुविधा लिने गरेको पाइएको छ ।

मन्त्रालयले लोन्तरलाई उपलब्ध गराएको विवरणमा मन्त्री यादवका सल्लाहकार डा. कृष्णकुमार राई र प्रेस सल्लाहकार भक्त थापाले सवारी सुविधा लिँदै आएको उल्लेख छ ।

डा. राई बा१झ ८४७५ नम्बरको प्राडो चढ्छन् भने प्रेस सल्लाहकार थापाले बा१झ ८५१७ नम्बरको सुजुकी जीप चढ्ने गरेका छन् । दुवै गाडी स्वास्थ्य सेवा विभागको स्वामित्वमा छन् ।

डा. राई गएको प्रतिनिधिसभा चुनावअघि कांग्रेसबाट संघीय समाजवादी फोरम, नेपालमा प्रवेश गरेका थिए ।

खोटाङबाट प्रतिनिधिसभा सदस्यको उम्मेदवार समेत बनेका राई वाम गठबन्धनका विशाल भट्टराईसँग पराजित भएका थिए ।

सचिवलाई प्राडोसहित २ गाडी

सचिव डा. पुष्पा चौधरीले बा१झ ६६५८ नम्बरको प्राडो र बा२झ २७८६ नम्बरको फोर्ड कार चढ्छिन् ।

मन्त्री यादव र अर्का सचिव चन्द्रकुमार घिमिरे भने मन्त्रालयको स्वामित्वभन्दा बाहिरको गाडी चढ्ने गरेको देखिन्छ । 

स्वास्थ्य राज्यमन्त्री डा. सुरेन्द्रकुमार यादवले बा१झ७२६५ नम्बरको प्राडो चढ्ने गरेका छन् भने उनले सचिवालयका लागि भनेर बा१झ ५६७५ नम्बरको पजेरो पनि लिएका छन् ।

पाँचवटा बिग्रिएर थन्किए

५ वटा गाडी बिग्रिएर थन्किएको देखिन्छ, त्यसमध्ये एउटा टाटा जीप बिग्रिएर कामै नलाग्ने अवस्थामा रहेकाले लिलाम गर्नुपर्ने अवस्थामा रहेको मन्त्रालयले उपलब्ध गराएको विवरणमा उल्लेख छ ।

हेर्नुहोस्, मन्त्रालयमा रहेका गाडी र प्रयोगकर्ताहरूको विवरणः

५२ वटा मोटरसाइकल/स्कूटर

मन्त्रालयको स्वामित्वमा ५२ वटा मोटरसाइकल तथा स्कूटर छन् । त्यसमध्ये ६ वटा बिग्रिएर कामै नलाग्ने भएकाले लिलाम गर्नुपर्ने अवस्थामा रहेको मन्त्रालयले उपलब्ध गराएको विवरणमा उल्लेख छ ।

दुईपांग्रे सवारी साधन र प्रयोगकर्ताको विवरणः

सचिवलाई सय, अन्यलाई ७२ लिटर इन्धन

सचिवले मासकि १०० लिटर इन्धन सुविधा पाउँदै आएको मन्त्रालयले जनाएको छ । सचिवभन्दा तल्लो वरीयताका सवारी प्रयोगकर्ताले भने मासिक ७२ लिटर इन्धन पाउने गरेको मन्त्रालयले उपलब्ध गराएको विवरणमा उल्लेख छ ।

दुईपांग्रे सवारीको हकमा भने प्रतिमहिना ८ लिटर इन्धन उपलब्ध गराउने गरिएको मन्त्रालयले जनाएको छ ।

पढ्नुहोस्, यस श्रृंखलाअन्तर्गत अघिल्ला भागहरू:

भाग- ८ : उपराष्ट्रपतिकै प्रयोजनमा १० गाडी, फरक ब्राण्ड र समयमा किनिएका गाडीको मूल्य उही !​  

भाग- ७ : मानव अधिकार आयोगमा गाडीको लश्कर, अध्यक्षभन्दा सदस्य चढ्छन् महंगो र नयाँ गाडी

भाग- ६ : सञ्चार मन्त्रालयका पाँच गाडी ‘पूल’मा, क–कसले लिन्छन् सवारी सुविधा ?

भाग- ५ : भूमि व्यवस्था मन्त्रीको सचिवालयलाई नै दुई गाडी, पाँचवटा बिग्रिएर प्रयोगविहीन !

भाग- ४ : यातायात मन्त्रालयका सचिवलाई सेतो र रातो प्लेटका दुई गाडी, एउटैको मूल्य करोडभन्दा बढी !

भाग- ३ : शहरी विकासमा मन्त्रीका आसेपासेको रजगज, सचिवलाई दिउँसो र बेलुका बेग्लाबेग्लै गाडी !

भाग- २ : महिला मन्त्रीलाई काठमाडौंभित्र र बाहिरलाई छुट्टाछुट्टै गाडी, उपसचिवलाई मन्त्रीसरह इन्धन !

भाग- १ : खेलकुद मन्त्रालयका सचिवलाई दुई विलासी गाडी, कार्यालय सहयोगीसम्मलाई सवारी सुविधा [विवरणसहित]