सहुलियत रुपमा पुस्तक उपलब्ध गराई पठन संस्कृतिको विकास गर्ने उद्देश्यले नेपाल प्रज्ञा प्रतिष्ठानले १ महिने पुस्तक प्रदर्शनी शुरू गरेको छ । 

प्रतिष्ठानको वार्षिक कार्यक्रम अन्तर्गत मंसिर १ गतेदेखि प्रदर्शनी शुरू गरिएको संयोजक सुधीर ढुंगेलले जानकारी दिए ।

प्रदर्शनीमा २ रुपैयाँदेखि १ हजार ४०० रुपैयाँसम्मका पुस्तक राखिएका छन् । प्रतिष्ठानले प्रकाशन गरेका ५०० प्रकारका पुस्तक र १०० प्रकारका पत्रिका सहुलियत मूल्यमा खरीद गर्न सकिने उनले सुनाए ।

प्रदर्शनीमा २ रुपैयाँको ‘काव्य अर्चना’ र १ हजार ४०० रुपैयाँको ‘प्रज्ञा–नेपाली–अंग्रेजी शब्दकोश’ छन् । यसैगरी पछिल्लो समय बजारमा आएका डा. बद्रि पोखरेलको ‘अर्थशास्त्रका शब्दावली’, गोविन्दप्रसाद घिमिरे ‘वेदमणि’को ‘कर्मदर्शन’, जगतप्रसाद उपाध्याय र विष्णुप्रभातले सम्पादन गरेका ‘दर्शनावली–६’, हेमनाथ पौडेल, सुरेन उप्रेती, शशी लुमुम्बु लगायतले सम्पादन गरेका ‘अन्तरदेशीय नेपाली कथाहरू’ पनि प्रदर्शनीमा छन् । 

प्रदर्शनीमा १५ देखि ६० प्रतिशतसम्मको सहुलियत दिएर पुस्तक बिक्री भइरहेको छ । यहीँ मंसिर मसान्तसम्म आयोजना गरिएको प्रदर्शनीप्रति पाठकको रुचि बढेमा पृथ्वीजयन्तीसम्म अर्थात् आगामी पुस २७ गतेसम्म विस्तार गर्न सकिने संयोजक ढुंगेलले बताए ।

प्रदर्शनीमा प्रकाशन मितिदेखि विक्रम संवत् २०५५ सालसम्मका प्रतिष्ठानले प्रकाशन गरेका समकालीन साहित्य, प्रज्ञा, सयपत्री, कविता लगायतका पत्रिका ५ रुपैयाँमै उपलब्ध गराइने जनाइएको छ । 

प्रदर्शनीको उद्घाटन गर्दै कुलपति गंगाप्रसाद उप्रेतीले प्रतिष्ठानले प्रकाशन गरेका पुस्तक देशविदेशमा जानुपर्छ भनी सहुलियत रुपमा दिने उद्देश्यले कार्यक्रम आयोजना गरिएको बताए । प्रदर्शनीले पुस्तकको गरिमालाई व्यापकता दिने उनको भनाइ थियो ।