काभ्रेपलाञ्चोकको धुलिखेल नगरपालिका–११ तिरतिरे धारास्थित बीपी राजमार्गमा शनिवार बिहान यात्रुबाहक बसको ढोकाबाट खस्दा १ जनाको मृत्यु भएको छ ।

काँकडभिट्टाबाट काठमाडौं आउँदै गरेको ना६ख ९१३८ नम्बरको बसको ढोकाबाट खस्दा गम्भीर घाइते भई उपचारका लागि धुलिखेल अस्पताल पठाइएकामा उपचारका क्रममा मृत्यु भएको जिल्ला प्रहरी कार्यालयका प्रहरी नायब उपरीक्षक दीपक गिरीले बताए ।

मृत्यु हुनेमा झापाको तोपगाछी–७ बस्ने ४२ वर्षीय खड्गनारायण श्रेष्ठ रहेको प्रहरीले जनाएको छ । गाडीको ढोका छेउमा उभिएर चुरोट खाँदै गरेको अवस्थामा हात फुत्केर लडेको प्रहरीले जनाएको छ ।

बस र चालकलाई नियन्त्रणमा लिएर आवश्यक अनुसन्धान भइरहेको गिरीले बताए ।