‘नेपाल भ्रमण वर्ष २०२०’ प्रवद्र्धनका लागि झापाको मेचीनगरबाट महिला मात्र रहेको एक टोली स्थानीय पर्यटकीय स्थलको पैदलयात्रा (ट्रेकिङ) मा निस्किएको छ ।

शनिवार बिहान धुलाबारी मोडबाट हरियो टी सर्ट, कालो पाइन्ट र रातो जुत्ता लगाएर यात्रामा निस्किएको महिला टोलीमा मेचीनगरका ३५ अगुवा महिला सामेल छन् ।

मेचीनगर नगरपालिकाकी उपप्रमुख मीना पोखरेल उप्रेतीले पैदल यात्रामा निस्किएका महिलालाई ‘साहसी महिला’को संज्ञा दिँदै अबिर टीका लगाएर यात्राको शुभकामना व्यक्त गरेकी छन् । उनले महिला मात्रै सहभागी पैदलयात्रा झापामा पहिलो पटक भएको जनाउँदै महिला चुलोचौकामा सीमित हुने जमाना अब गएको बताइन् ।

पैदल टोलीले मेचीनगरको थोप्लेविरान पर्यटकीय क्षेत्र, शान्तिनगरस्थित भाषाशास्त्री महानन्द सापकोटाको जन्मस्थल देवानछाप हुँदै बुद्धशान्ति गाउँपालिकाको सुनमाईस्थित धारागोला दृश्यावलोकन स्तम्भसम्मको १९ किलोमिटर यात्रा सम्पन्न गर्ने टोली प्रमुख रेणुका डाँगीले बताइन् । टोलीमा मेचीनगरको राजनीतिक, सहकारी, शिक्षा, पत्रकारिता, साहित्य र खेलकुद क्षेत्रमा क्रियाशील संघसंस्थाका अगुवा रहेका छन् ।

उनीहरूले राष्ट्रिय झण्डा र भ्रमण वर्षको लोगो बोकेका छन् ।