साउदी अरबका युवराज मोहम्मद बिन सलमानले संसारका सबभन्दा धनी व्यक्ति तथा अमेजनका सीईओ जेफ बेजोसको फोन सन् २०१८ मा ह्याक गराएको खुलासा बेलायती पत्रिका द गार्डियनले गरेको छ । 

रिपोर्टमा लेखिएअनुसार, युवराजको व्यक्तिगत नम्बरबाट पठाइएको एक ह्वाट्सयाप मेसेजपछि बेजोसको फोन ह्याक भएको थियो । 

डिजिटल फोरेन्सिक एनलाइसिसका अनुसार, युवराजको नम्बरबाट पठाइएको मेसेजमा एउटा करप्ट फाइल थियो र त्यसैले बेजोसको फोन ह्याक गरिदियो । बेजोस अमेरिकाको प्रसिद्ध पत्रिका वाशिङटन पोस्टका मालिक हुन् ।

पोस्टका पत्रकार जमाल खशोग्गीको हत्यामा युवराजको भूमिका रहेको भनी साउदी अरबको आलोचना भएको थियो । 

नाम नछाप्ने शर्तमा एक सूत्रले द गार्डियनलाई भने, फोन ह्याकिङ हुनुअघि बेजोस र युवराजबीच मित्रवत् कुराकानी भइरहेको थियो । बेजोसलाई करप्ट भिडियो फाइल पठाएको केही घन्टामा नै उनको फोनको सबै डेटा ट्रान्सफर गरिएको थियो । तर बेजोसको फोनबाट प्राप्त जानकारीका् उपयोग कहिले, कसरी र कहाँ गरिएको भन्ने जानकारी छैन । 

अमेजनका अमेरिकी संस्थापकलाई घेर्नमा साउदीको भूमिकाको खुलासा भएपछि वाल स्ट्रीटदेखि सिलिकन भ्यालीसम्म सनसनी फैलियो । पश्चिमी लगानीकर्ताहरूलाई साउदी अरबमा लगानी गर्न आकर्षित गर्ने युवराज सलमानको कोशिशलाई पनि यसले झड्का दिन सक्छ । 

युवराज सलमानले मेसेज पठाएको नौ महिनापछि एक अमेरिकी ट्याब्लोइडले बेजोसको निजी जिन्दगी र उनका ह्वाट्सयाप मेसेज लगायतका गोपनीय जानकारी छापेको थियो । सन् २०१८ मा बेजोसको फोन ह्याक भएको पाँच महिनापछि वाशिङटन पोस्टका पत्रकार खशोग्गीको हत्या गरिएको थियो । 

साउदी अरबले चाहिँ फोन ह्याक गरेको दाबीलाई खारेज गरिसकेको छ । अनि खशोग्गीको हत्यामा पनि भूमिका नरहेको बताएको थियो तर गत डिसेम्बर महिनामा साउदीको एक अदालतले गोप्य पुर्पक्ष गरेर हत्यामा संलग्न भनिएका आठ मानिसलाई दोषी ठहर गरेको थियो । 

डिजिटल फरेन्सिक विज्ञहरूले बेजोसको निजी जिन्दगीको गोप्य जानकारी छापिएपछि अनुसन्धान थालेका थिए । त्यसक्रममा खोज्दै जाँदा साउदी युवराजको संलग्नता भेटियो । द वाशिङटन पोस्टले साउदी अरबविरुद्ध समाचारहरू हाल्ने गरेकाले युवराजले बेजोसलाई तारो बनाएको हुन सक्ने अनुमान गरिएको छ ।

एजेन्सी