काठमाडौं – काँडाघारीस्थित मनोहरा खोलाको छेउमा सागर डिपोसँगै चिया/खाजा पाइने एउटा सानो होटल छ ।

यो त्यही होटल हो, जुन अपहरणपछि सोमबार मृत भेटिएका बालक निशान खड्काकी आमा चमेली खड्काले करीब ८/९ वर्षदेखि सञ्चालन गर्दै आएकी छिन् ।

होटलमा गोपाल तामाङ नाम गरेका व्यक्ति (जो प्रहरी इन्काउन्टरमा मारिए) नियमित खाजा/खाना खान्थे ।

निकट स्रोतले जनाएअनुसार पेन्टरको काम गर्ने गोपालले सो होटलमा खान थालेको ४/५ वर्ष नै भइसकेको थियो ।

उनी निशान र आमा दुवैका लागि परिचित थिए । यतिसम्म कि गोपालले १२/१५ हजारको उधारोसमेत राख्ने गरेका थिए ।

स्थानीय हाइल्याण्ड स्कूलमा कक्षा ६ मा अध्ययनरत ११ वर्षीय निशान आइतबार स्कूलबाट फर्किए । आफ्नै होटलमा आएर खाजा खाएपछि आमा चमेलीले निशानलाई मोबाइल किन्दिन भनेर पैसासहित गोपाललाई पठाइन् ।

१२/१५ सय पर्ने सामान्य मोबाइल किनेर गोपालसँग निशान होटलमा फर्किए ।

त्यसपछि गोपालले नै निशानलाई घुमाउन भनेर बाहिर लगे । उनले बालककी आमा चमेलीसँग नै सोधेर साइकलमा राखी घुमाउन लगेका थिए ।

उनीहरू त्यहाँबाट निस्किएको लामो समयसम्म पनि फर्किएनन् । साँझ अबेरसम्म नआएपछि आतालिएकी चमेलीले प्रहरीलाई खबर गरिन् ।

प्रहरी तुरुन्तै खोजतलासमा जुट्यो । तर निशानलाई जीवित भेट्न सकिएन ।

स्थानीयले ४/५ मिनेटसम्म सुनेका थिए 'निशानको रोदन'

निशानको शव आइतबार बिहान भक्तपुर नगरपालिका वडा नम्बर ७ स्थित स्थानीय श्याम लवटको निर्माणाधीन घरको जगमा भेटियो ।

प्रहरीका अनुसार उनको हत्या आइतबार बेलुका ९ देखि १० बजेको बीचमा नै भएको थियो ।

स्थानीयले त्यतिबेला करीब ५ मिनेटसम्म बालक रोएको र चिच्याएको सुनेका रहेछन् । कुनै घरमा बच्चा रोएको होला भनेर कसैले चासो दिएनन् ।

अपहरणकारीले कपडाले मुख थुनेर निशानको हत्या गरी घरको जगमा किचेर छाडेका थिए । आइतबार बिहान घटनास्थलमा पुग्दा हिलाम्मे अवस्थामा निशानको शव भेटिएको थियो ।

अपहरणकारीलाई पछ्याउँदै इन्काउन्टर !

शव भेटिएपछि प्रहरीको एक टोलीले अपहरणकारीलाई पछ्याउन थाल्यो ।

भक्तपुरको सूर्यविनायक पुग्दा प्रहरी टोलीमाथि नै आक्रमणको प्रयास भयो । त्यसपछि प्रहरीले चलाएको गोली लागेर अजय तामाङ र गोपाल तामाङ नाम गरेका दुई व्यक्तिको मृत्यु भयो ।

गोपाल तिनै व्यक्ति हुन्, जोसँग आमाले निशानलाई घुम्न पठाएकी थिइन् ।