काठमाडौं–इलाममा अनशनरत डा गोविन्द केसीलाई काठमाडौं ल्याइएको छ ।

 स्वास्थ्य स्थिति गम्भीर भएपछि उपचारको लागि उनलाई  शुक्रबार बिहान ३ बजे नेपाली सेनाको नाइटभिजन हेलिकप्टरमार्फत काठमाडौँ ल्याइएको हो । 

डा केसीको मुटुको समस्यासहित स्वास्थ्य अवस्था कमजोर भएको पाइएको उनका सहयोगी डा अभिशेकराज सिंहले बताए । 

‘डा केसीको शारीरिक स्थिति एकदमै कमजोर छ, त्यसैले हामीले चिकित्सकको टोलीसँग समन्वय गरेर काठमाडाैं ल्याएका हौं’ उनले भने । 

डा केसीलाई एम्बुलेन्स मार्फत इमालबाट भद्रपुर र त्यहाँबाट नाइटभिजन हेलिकप्टरमा काठमाडौं ल्याइएको थियो । त्रिभुवन विमानस्थलबाट उनलाई एम्बुलेम्समा राखेर सिधै त्रिवि शिक्षण अस्पतालको आइसीयुमा पुर्याइएको थियो । 
यसैबीच नेपाली काङ्ग्रेसका नेता तथा सांसद गगन थापाले डा गोविन्द केसीसँग भएको सम्झौताअनुसार नै राष्ट्रिय चिकित्सा शिक्षा विधेयक पारित गर्न आग्रह गरेका छन् । 
सरकारले चाहेमा अझै पनि डा केसीसँगको सम्झौतालाई विधेयकमा समेट्न सक्ने थापाले बताए । 

 शिक्षा तथा स्वास्थ्य समितिले पारित गरेपनि संसद्मा विधेयकमाथि आफूले फरक मत राख्ने ठाउँ जीवितै रहेको बताउँदै नेता थापाले बिहीबार पत्रकार सम्मेलन गरी भने, “सरकारले चाहेमा सदनको प्रक्रियालाई पूर्ण सम्मान गर्दै डा केसीको सम्झौतालाई विधेयकमा समेट्ने ठाँउ बांँकी नै छ ।”