प्रदेश सरकारले गण्डकी प्रदेश प्रहरीलाई हस्तान्तरण गर्‍यो ३५ थान मोटरसाइकल

साउन २, २०७६

कास्की – समुदाय-प्रहरी साझेदारी कार्यक्रमअन्तर्गत गण्डकी प्रदेशको आन्तरिक मामिला तथा कानून मन्त्रालयले गण्डकी प्रदेश प्रहरी कार्यालय मातहतका प्रहरी इकाइहरूका लागि ३५ थान मोटरसाइकल हस्तान्तरण गरेको छ ।

गण्डकी प्रदेश प्रहरी कार्यालय पोखरामा बुधवार आयोजित कार्यक्रममा गण्डकी प्रदेशका मुख्यमन्त्री पृथ्वी सुब्बा गुरुङले प्रदेश प्रहरी कार्यालय पोखराका प्रमुख प्रहरी नायव महानिरीक्षक विनोद शर्मा घिमिरेलाई ती मोटरसाइकलको साँचो हस्तान्तरण गरेका हुन् ।


ADVERTISEMENT

कार्यक्रमलाई सम्बोधन गर्दै मुख्यमन्त्री गुरुङले सवारी साधनको अभावका बावजुद् पनि उत्कृष्ट सेवा प्रदान गरिरहेको नेपाल प्रहरीलाई अब समयानुकूल परिष्कृत गर्दै लैजानुको विकल्प नरहेको बताए ।

प्रहरी इकाइहरूको स्तरवृद्धि एवं स्रोत साधनमा आत्मनिर्भर बनाउन गण्डकी प्रदेश सरकार तत्पर रहेको बताउँदै मुख्यमन्त्री गुरुङले मोटरसाइकल हस्तान्तरणपश्चात प्रहरी सेवा प्रवाहमा थप सहजता आउने कुरामा आफू विश्वस्त रहेको उल्लेख गरे ।

कार्यक्रममा गण्डकी प्रदेशका आन्तरिक मामिला तथा कानून मन्त्री हरिबहादुर चुमानले विकासको मुख्य आधार नै शान्ति सुरक्षा भएकाले प्रदेश अन्तर्गतको शान्ति सुरक्षालाई थप मजबुत बनाउन मोटरसाइकल हस्तान्तरण गरिएको बताए ।

सो अवसरमा गण्डकी प्रदेश प्रहरी कार्यालय पोखराका प्रमुख प्रहरी नायव महानिरीक्षक विनोद शर्मा घिमिरेले उपलब्ध स्रोत साधनहरुको भरपुर सदूपयोग गर्दै प्रदेश अन्तर्गतको शान्ति सुरक्षालाई चुस्त दुरुस्त बनाउन गण्डकी प्रदेश प्रहरी सदैव कटिबद्ध रहने उल्लेख गरे ।

साउन २, २०७६ मा प्रकाशित

प्रतिक्रिया दिनुहोस