कोविड–१९ नाम दिइएको कोरोना भाइरसको प्रकोपबाट मित्रराष्ट्र चीन केही समययता आक्रान्त छ । कोरोनाका कारण हालसम्म २ हजारभन्दा बढीले ज्यान गुमाउनुपरेको छ ।

हुवानबाट शुरू भएको कोरोनाको महामारी नियन्त्रण गर्न चीनले हरसम्भव प्रयास गरिरहेको छ । कोरोना भाइसर अन्यत्र नफैलियोस् भन्नका लागि चीनले सुरक्षाका कनेकन उपाय गरिसकेको छ ।

कोरोना नियन्त्रणका लागि चीनले १ हप्तामा १ हजार शय्याको अस्पताल निर्माण गर्नेदेखि कुनै कसर बाँकी राखेको छैन । कोरोनाविरुद्ध लडिरहेको मित्रराष्ट्र चीनलाई सहयोग गर्नुपर्ने आवाज नेपालको संसदमा उठ्यो ।

संसदमा आवाज उठेपछि सरकारले चीनलाई १ लाख मास्क पठायो । रातारात करोड मास्क बनाउन सक्ने र हप्तादिनमै हजार शय्याको अस्पताल बनाउने क्षमता भएको चीनको लागि १ लाख मास्क ठूलो कुरा भएन । ठूलो कुरा त मित्रता थियो, नेपालले प्रदर्शन गरेको । 

नेपाल–चीन कूटनीतिक सम्बन्धमा ६ दशकमा चीनले नेपाललाई सहयोग मात्र गरिरहेको छ । ५ वर्ष अगाडिको विनाशकारी महाभूकम्पमा गरेको मानवीय सहयोग तथा पुनर्निर्माणमा उसले देखाएको तत्परता प्रशंसायोग्य छ । सबभन्दा ठूलो कुरा त नेपालमा हुने राजनीतिक घटनाक्रमको सम्बन्धमा चीनले कुनै हस्तक्षेप गरेको छैन । 

नेपाल–चीन सम्बन्धमा राष्ट्रपति सी चिनफिङबाट असोजमा भएको नेपाल भ्रमणका क्रममा व्यक्त सद्भाव स्मरण गर्न सकिन्छ । ‘चीन र नेपालबीच दौत्य सम्बन्ध भएको आधा शताब्दीभन्दा बढीको अवधिमा २ देशले छिमेकी मुलुकबीचको मैत्रीपूर्ण सम्बन्धको विषम नमूना पेश गरेका छन । मैले राष्ट्रपतिज्यूलाई के भन्न खोजेको हुँ भने चीन र नेपालको बीचमा केही समस्या छैन, मित्रता मात्र छ,’ नेपाल भ्रमणको क्रममा सीले भनेका थिए । 

अप्ठ्यारो परिस्थितिमा रहेको छिमेकी मित्रराष्ट्र चीनलाई हरतवरले सहयोग गर्नु छिमेकी राष्ट्रको कर्तव्य र दायित्व हुन आउँछ । कोरोनाको प्रकोपबाट चीनले छिट्टै मुक्त भयो भने नेपालमा चिनियाँ पर्यटक आउने विश्वास गरिएको छ ।

विश्वमा उदीयमान अर्थतन्त्रको छवि बनाएको चीनले गर्ने आर्थिक प्रगति नेपालको आर्थिक समृद्धिको लागि एउटा आधार बन्न सक्छ ।