राष्ट्रिय सभाका अध्यक्ष गणेशप्रसाद तिमिल्सिनाले संसद् सचिवालयका कर्मचारीहरूको सेवा सुविधा बढाउने अवस्था नरहेको स्पष्ट पारेका छन् । 

संसद् सचिवालयका कर्मचारीहरूले आफ्नो सेवा सुविधा वृद्धि गर्न माग गरिरहेका बेला अध्यक्ष तिमिल्सिनाको यस्तो भनाइ बाहिर आएको हो । संसद् सेवा दिवसको अवसर पारेर मंगलवार काठमाडौंमा आयोजित एक कार्यक्रममा बोल्दै उनले मुलुकको आर्थिक अवस्थामा सुधार नआई संसद सचिवालयको लागि बजेट बढाउन नमिल्ने स्पष्ट पारे । 

अध्यक्ष तिमिल्सिनाले जनताको आर्थिक अवस्था कमजोर भएको बेला कर्मचारीहरूले आफ्नो सुविधा थप गर्न माग गर्न नहुनेतर्फ पनि सचेत गराए । देशको आर्थिक अवस्थामा सुधार आएपछि ती विषयहरूलाई सम्बोधन गर्न जोड दिने उनले आश्वासन दिए । उनले सांसदहरूको सुविधा बढाउनुपर्ने विषय पनि उठान हुने गरेको उल्लेख गर्दै अहिले त्यस विषयमा ध्यान दिन नसकिने बताए । 

‘संसद् सचिवालयका कर्मचारीहरूको सेवा, सुविधा बढाउने अहिले पनि कहीँ पनि ठाउँ छैन । अतिरिक्त काम गरेकोमा भत्ता दिऊ, अलिकति बढाऔँ भन्यो भने जनता के भएका छन भन्ने आइराखेको अवस्था छ । देशको आर्थिक अवस्था सुधार हुँदै जाँदा ती अपेक्षाहरू पनि पूरा हुने हुन् । अन्यथा संसदमा गर्नुपर्ने धेरै खर्च व्यवस्थापन गर्नका लागि, यसले राम्रो काम गर्नका लागि धेरै चिज छ । समितिको तर्फबाट बाहिर फिल्डमा जाँदा सांसदहरूलाई सुविधा बढाउनुपर्ने अवस्था छ । यस्तो स्थितिमा हामी अहिले छौँ । त्यसकारण देशको आर्थिक विकास र समृद्धितिर जाँदा मात्रै यी कुारहरूलाई पनि जोड दिन सक्छौँ’, तिमिल्सिनाले भने ।

अध्यक्ष तिमिल्सिनाले संसदको काम कारबाहीबारे वस्तुनिष्ठ समिक्षा गर्दैं अघि बढ्नुपर्ने आवश्यक्तासमेत औँल्याए । 

कार्यक्रममा बोल्दै पूर्वसभामुख तारानाथ रानाभाटले संसद अझै पनि सरकार र कर्मचारीतन्त्रको अपहेलनाबाट मुक्त हुन नसक्दा मुलुकमा प्रजातन्त्र कमजोर हुन पुगेको बताए । उनले संसद् सचिवालयलाई स्वायत्त निकाय बनाए पनि त्यसले जनताको सार्वभौम निकायको रुपमा काम गर्ने क्षमताको विकास गर्न नसकेको गुनासो गरे । 

‘संसद् जहिले पनि कार्यकारिणी र कर्मचारीतन्त्रबाट डोमिनेट हुनुपर्ने अवस्थाबाट प्रजातन्त्रले अग्रगामी स्वरुप लिन सक्दैन । र, आफ्नो उद्देश्य हासिल गर्न सक्दैन भनेर हामीले छलफल सुरु ग¥यौं । तितो अनुभवहरू छन । समितिमा यसलाई स्वायत्त निकाय बनाउनु प¥यो भनेर छलफल गर्दा मन्त्रीहरूसँग भएका तिता बहसहरू भएको थियो । त्यसबाट यसलाई स्वायत्त निकायको रुपमा विकास गर्न सकियो । यसमा मेरो पनि योगदान भएकोले गौरवको अनुभूति गर्दछु । यदि संसद् कमजोर भइदियो भने मुलुक कमजोर भएर जान्छ । मलाई अन्यथा नलिनुहोला । २०४८ सालदेखि अहिलेसम्मको अनुभव हेर्दा हामी अझै परिपक्व प्रजातन्त्र हुन सकेका छैनौँ । संसद कमजोर छ’, रानाभाटले भने ।