सामाजिक सञ्जालमा भाइरल बागलुङकी सिम्रन परियारले ५ दिनमा ९ वटा गीत रेकर्ड गराएकी छन् । सानैदेखि गीत गुनगुनाउने सिम्रन भोजराज थापाले लिएको युट्युब अन्तवार्तापछि भाइरल भएकी थिइन् ।

उक्त अन्तवार्तामा उनले गीत गाउँदै गरेका भिडियो क्लिपहरू सामाजिक सञ्जालमा छाएका थिए । 

त्यसपछि उनी काठमाडौं आएर गीत रेकर्ड गराएकी थिइन् । 

गीतकार सुनील बिसीले प्रमोद खरेलको स्वरमा रहेको आफ्नो गीत ‘उस्लाई पाउन २’को फिमेल भर्सन गाउन दिँदै सिम्रनलाई गायनमा ब्रेक दिएका थिए । 

उनले गाएका ‘मुटुमै घाउ छ...’, ‘ए साइँला परेली भित्र’, ‘पानी परेको’ गीत युट्युबमा सार्वजनिक भइसकेका छन् । ५ दिनमा ९ वटा गीतमा स्वर दिएर सिम्रन मंगलवार घर (बागलुङ) फर्किएकी छन् । उनलाई काठमाडौं ल्याउने भोजराज थापाले उक्त जानकारी दिएका हुन् । ९ वटा गीत गाउँदा सिम्रनले ७० हजार रूपैयाँ कमाइ गरेकी छन् । 

सामाजिक सञ्जालमा भाइरल भएपछि गायनमा आएकी सिम्रनको स्वरलाई धेरैले रुचाएका छन् । संगीतकर्मीहरुले उनलाई संगीत सिक्न सुझाव दिएका छन् । सिम्रन हाल कक्षा १२ मा अध्ययनरत छिन् ।