गएरातिको भूकम्पका कारण जाजरकोटको बारेकोट गाउँपालिकामा हजारौं घरहरू भत्किएका छन् । भूकम्पको मुख्य इपिसेन्टर रहेको बारेकोमा हजारौं घरहरू भत्किए पनि अहिलेसम्म मानवीय क्षतिको विवरण आएको छैन । बारेकोट गाउँपालिकाका अध्यक्ष वीरबहादुर गिरीले भूकम्पले पालिकामा भौतिक क्षति भए पनि मानवीय नभएको बताए । 

भूकम्पको झड्का लामो समयसम्म रहेका कारण मान्छेहरू घरबाहिर निस्किएकोले मानवीय क्षति हुन नपाएको उनले बताए । 'ठूलो भूकम्प र मानवीय सुरक्षालाई हेर्ने हो भने तादम्यता नमिल्ने खालको देखिन्छ । अन्य पालिकामा ठूलै मानवीय क्षति भए पनि संयोग नै भनौं मुख्य इपिसेन्टर रहेको हाम्रो पालिकामा भने मानवीय क्षति भएको छैन,' गिरीले लोकान्तरसँग भने, 'भूकम्पको झड्का अलि लामो समय रह्यो । त्यतिन्जेल मानिसहरू घरबाहिर निस्किन पाए । म स्वयं पनि कोठा भित्रबाट निस्किसकेपछि पर्खालहरू भत्किएर झरेका छन् ।'

भूकम्पपछि राति नै पालिकाको ९ वटै वडामा पुगेर घाइतेलाई नजिकको स्वास्थ्य संस्थामा पुर्‍याउने काम गरेको उनले बताए । 'हाम्रो गाउँपालिकाको वडा नम्बर १ को रामीडाँडा भूकम्पको केन्द्रबिन्दु हो । सबैभन्दा बढी घरहरू वडा नम्बर १ र वडा नम्बर २ मै भत्किएको छ,' उनले थपे, 'पालिकाभित्र करिब १ हजार जति घरहरू भत्किएका होलान् । बस्न नमिल्ने घरको संख्या धेरै छ । सबै वडाको विवरण संकलन भइरहेको छ ।'

ढुंगा र माटोबाट बनेका एक हजार जति कच्ची घरहरू भत्किएको उनले बताए ।

एक दर्जन जति मान्छेहरू घाइते भएको उनको भनाइ छ । जसमध्ये ९ जनाको अवस्था अलि गम्भीर रहेको उनले बताए । उनका अनुसार उनीहरूलाई थप उपचारका लागि हेलिकप्टरबाट सुर्खेत पठाउने तयारी छ ।

राति नै घाइतेहरूलाई स्वास्थ्य संस्थामा पुर्‍याउने, उपचार गराउने, घरभित्र रहेका मान्छेहरूलाई बाहिर निकाल्ने, सुरक्षित ठाउँतिर बसाउने र घरका सामग्री बाहिर निकाल्ने काम गरिएको उनले बताए । 

'सयौं परिवारहरू विस्थापित भएर अहिले घर बाहिर हुनुहुन्छ । उहाँहरूको आवास र खानपिनको व्यवस्था गर्न हम्मेहम्मे भएको छ,' उनले भने,'मान्छेहरू आतंकित भएका छन् । घर सुरक्षित हुन्छ भन्ने मनोविज्ञान कसरी बनाउन सकिन्छ भन्नेमा पनि लागेका छौं ।'

विस्थापित भएकाहरूलाई पालिकाको तर्फबाट तत्काल खाद्यान्न सामग्री उपलब्ध गराएर बस्नका लागि पालसम्म भए पनि व्यवस्था गर्न लागेको उनले बताए ।

जाजरकोटकै सबैभन्दा विकट पालिका भएका कारण विस्थापितहरूको बस्न र खान समस्या भएको उनले बताए ।