शुक्रवार राति गएको भूकम्पमा परेर रुकुम पश्चिमको आठबीसकोट नगरपालिकाको एकै वडामा २७ जनाको मृत्यु भएको छ । वडा नम्बर १४ मा बिहानसम्म १४ जनाको मृत्यु भएकोमा अहिले संख्या २८ पुगिसकेको वडा सदस्य भर्दु मल्लले बताइन् । 

‘पूर्णगाउँको टोलमा मात्रै १४ जनाको मृत्यु भएको छ भने वडाका अन्य टोलमा समेत गरी अहिलेसम्म २७ जनाको मृत्यु भइसकेको छ,’ मल्लले लोकान्तरसँग भनिन्, ‘रातिदेखि नै हामी उद्धारमा लागेका छौं । वडा नम्बर १४ मा मात्रै १०० भन्दा बढी घाइते मानिसलाई हामीले उद्धार गरेका छौं ।’ मृतकहरूको शव पोस्टमार्टमका लागि नगर अस्पताल पुर्याउने काम जारी रहेको उनले बताइन् ।

‘वडामा रहेका जम्मा ८०० घरमध्ये कुनै पनि बचेका छैनन् । कुनै घर आधा चर्किएका छन् भने कुनै घर जडै देखि भत्किएका छन्,’ मल्लले थपिन्, ’तीन वटा स्वास्थ्य चौकीमध्ये २ वटा भत्कियो । स्कूल पनि भत्किएका छन् । अलि–अलि चर्किएको एउटा स्वास्थ्य चौकीमा घाइतेहरूलाई राखेर हामीले उपचार गराइरहेका छौं ।’

कतिपय घर परिवारमा एकै परिवारका धेरै सदस्यको मृत्यु भएको उनले बताइन् ।

‘हाम्रो वडामा केही पनि बाँकी रहेन,’ भावुक हुँदै उनले लोकान्तरसँग भनिन्,’ गाई, भैँसी, बाख्रा सबै मरेका छन् । स्थिति एकदमै भयावह छ ।’ 

उद्धारमा नेपाल रेडक्रसदेखि नेपाल प्रहरी रातिदेखि नै सक्रिय रहेको उनले जानकारी दिइन् ।