गायक प्रकाश दूतराज रेस्टुरेन्ट व्यवसायमा जोडिएका छन् । 

पछिल्लो समय ‘रिमै’ बोलको गीतबाट स्रोता–दर्शकको मन जितिरहेका उनले भाइ सन्तोष दूतराजसँग मिलेर काठमाडौंको बानेश्वरमा रेस्टुरेन्ट संचालनमा ल्याएका हुन् । 

वान सिनेमाजको अपोजिटमा उनीहरूले ‘झोलपट्टे रेस्टुरेन्ट’ संचालनमा ल्याएका छन्। ​

रेस्टुरेन्टको परिकल्पना सन्तोषको हो । दाई साङ्गीतिक क्षेत्रमा व्यस्त हुने भएकाले रेस्टुरेन्टमा आफूले समय दिँदै आएको सन्तोषले बताए । 

‘मेरो पढाइ होटल म्यानेजमेन्ट हो । यसअघि रेस्टुरेन्टमा वेटरको रुपमा समेत काम गरेको थिएँ’ सन्तोषले भने, ‘नेपालमा केही गर्छु भन्ने सोँच थियो । आफ्नो ज्ञान यही क्षेत्रमा भएकाले रेस्टुरेन्ट खोल्ने निर्णयमा पुगेँ । दाई–बुवाममी सबै मिलेर रेस्टुरेन्ट खोलेका हौँ । यसलाई हाम्रो पारिवारिक व्यवसाय भनौं ।’  रेस्टुरेन्टको नाम पनि उनले नै जुराएका हुन् । 

उनका अनुसार रेस्टुरेन्टमा ५० लाख रूपैयाँ हाराहारी लगानी भएको छ । नेपालीलाई मनपर्ने परिकार आफ्नो रेस्टुरेन्टमा पाइने उनले बताए । उनका अनुसार काठमाडौं भ्यालीभित्र अर्डर गरेर पनि फुड मगाउन सकिने छ।  पठाओ, भोज, फुडमाण्डुलगायतसँग समेत आफूहरूको सहकार्य रहेको उनले बताए । 

प्रकाश पनि सांगीतिक क्षेत्रबाट फुर्सद मिलेको समयमा प्रायः रेस्टुरेन्टमा पुग्ने गरेका छन् । ​रेस्टुरेन्टको औपचारिक उद्घाटन भने केही समयमा गर्ने योजना सन्तोषको छ ।  उनले प्रकाशका ‘चोली मैलै भो’लगायतका केही गीतमा अभिनयसमेत गरेका छन् ।