नेपाल आयल निगमले पेट्रोलको मूल्य ४ रुपैयाँ बढाउने निर्णय गरेको छ । निगम सञ्चालक समितिको आइतबार बसेको बैठकले सोमबार बिहानदेखि लागू हुनेगरी प्रतिलिटर ४ रुपैयाँ बढाउने निर्णय गरेको हो । 

इन्डियन आयल कर्पोरेशनबाट प्राप्त खरिद मूल्यअनुसार पेट्रोलको मूल्य प्रतिलिटर ४ रुपैयाँ ७६ पैसा बढेर आएको र सोहीअनुसार मू्ल्य समायोजन गरिएको निगमको भनाइ छ । जसअनुसार अब काठमाडौँमा पेट्रोलको मूल्य १७५ रुपैयाँ पुगेको छ । 

यस्तै डिजेल तथा मट्टितेलको मूल्य पनि ३९ पैसा बढेर आएको छ । तर हाललाई खुद्रा बिक्री मूल्यमा कुनै फेरबदल नगरी पुरानै मूल्य कायम गरिएको छ । 
यसैगरी एलपी ग्यासको मूल्य २७ रुपैयाँ ४४ पैसा बढेर आएको छ । मूल्य बढेसँगै निगमलाई एक सिलिन्डर ग्यासको मूल्य २९६ रुपैयाँ १५ पैसा घाटा हुने भएपनि मूल्यमा हेरफेर भने नगरिएको निगमले विज्ञप्तिमा उल्लेख गरेको छ ।