नेकपा (एमाले)का अध्यक्ष केपी शर्मा ओलीले कार्यकर्तालाई जातका पछि नलाग्न आग्रह गरेका छन् । इलामको चुलाचुलीमा बुधबार भएकाे कोणसभालाई सम्बोधन गर्दै उनले एमालेका उम्मेदवारलाई मत माग्दा जातीय कुरा नगर्न कार्यकर्तालाई निर्देशनसमेत दिए ।

पूर्वप्रधानमन्त्रीसमेत रहेका ओलीले एमाले पहिचानविरोधी नभएको स्पष्ट पार्दै जातका पछि नलाग्न आग्रह गरेका हुन् ।

इलाम–२ मा यही वैशाख १५ मा हुन गइरहेको उपनिर्वाचनमा आफ्नो पार्टीका उम्मेदवार सुहाङ नेम्वाङलाई जिताउन आग्रह गर्दै उनले एमालेले जति अन्य कसैले पनि दलित, मुस्लिम र जनजातिलाई अवसर नदिएको दाबी गरे ।  

‘जातीय आधारमा नभइ बिनाभेदभाव, योग्यता, क्षमताको आधारमा मूल्यांकन गरेर साथीहरू माथि पुगेका छन्,’ उनले भने, ‘त्यसकारण सामाजिक सद्भाव र राष्ट्रिय एकताको पक्षमा सबै जुटौं । ’

जनतालाई दिने सेवा सुविधा र जिम्मेवारी बोक्ने उम्मेदवार सुहाङबाहेक कोही नभएको पनि ओलीले दाबी गरे ।  उनले स्व सुवास नेम्वाङले दिएको योगदान नबिर्सन पनि आग्रह गरे ।

राजनीतिमा सहीलाई सही भन्न सक्नुपर्ने बताउँदै ओलीले त्यसमा सुवास सँधै अगाडि रहेको उनले बताए । ‘ज्ञान, क्षमताको हिसाबले सुवासजी सबैका गुरु हुनुहुन्थ्यो । उहाँको असामयिक निधन भएपछि उहाँको क्षेत्रमा उहाँकै छोरालाई उम्मेदवार बनाएका छौं । उहाँको मर्मलाई बुझेर अलमलमा नपरी, भ्रममा नपरी मतदान गर्न पनि  आग्रह गर्दछु,’ उनले भने । 

गठबन्धन र समीकरणले देश सँधै चल्न नसक्ने समेत बताएका छन्  । ‘सँधै समीकरण र सधैँ गठबन्धनले देश चल्दैन,’ उनले भने, ‘मिसन– ८४ मा  निर्णायक राजनीतिक राष्ट्रिय शक्तिको रुपमा हामीले देखाउनु पर्छ ।’ 

अब पनि अनेक प्रकारको जोड–घटाउ र मिलजुल गरेर, बहुमत पुर्याएर देश चल्न नसक्ने ओलीले स्पष्ट पारे । अहिले भने देशलाई बचाउन मात्रै समीकरण गरेको उनको भनाइ थियो ।  

इलाम–२ मा एमालेका सुहाङ र नेपाली कांग्रेसका डम्बर खड्काबीच मुख्य प्रतिस्पर्धा हुने आकलन गरिएको छ । 

विशेषगरी पहिचान पक्षधरले एमाले र ओलीलाई पहिचानविरोधी बताउँदै आएका छन् । उनले मंगलबार यसैको सफाइ दिएका हुन् ।

इलाम–२ मा पहिचान पक्षधरले पनि डकेन्द्रसिंह थेगिमलाई उम्मेदवार छन् ।