नेपाली सेनाको त्रिभुवन आर्मी क्लब सरस्वती युथ क्लबलाई हराउँदै शहीद स्मारक ‘ए’ डिभिजन लिग फुटबलको शीर्ष स्थानमा उक्लेको छ।

त्रिपुरेश्वरस्थित दशरथ रङ्गशालामा बिहीबारको खेलमा आर्मीले सरस्वतीलाई १–० गोलले पराजित गरेको हो। 

आर्मीका लागि पहिलो आफमा जर्ज प्रिन्स कार्कीले निर्णायक गोल गरे। उनले खेलको ३०औँ मिनेटमा दिनेश हेन्जनको पासमा गोल गरेका थिए। दोस्रो हाफमा आर्मीले निकै प्रयास गरे पनि गोल गर्न भने सकेन् ।

उक्त खेलमा आर्मीका विकास खवास ‘म्यान अफ दी म्याच’ घोषित भए। आर्मी पाँचौँ चरणको खेल सकिँदासम्म पाँच खेलमध्ये चारमा जित तथा एउटामा हार बेहोर्दै १२ अङ्कका साथ शीर्ष स्थानमा पुग्न सफल भएको छ। सरस्वती युथ क्लब अहिलेसम्म जितबिहीन अवस्थामा छ। अहिलेसम्म खेलेको पाँचवटै खेलमा सरस्वती क्लब पराजित भएको छ।