सभामुखमा अग्निको एकल उम्मेदवारी, निर्विरोध निर्वाचित हुन यस्तो छ कानूनी व्यवस्था

प्रतिनिधिसभा सभामुख पदमा नेपाल कम्युनिस्ट पार्टी (नेकपा) सांसद अग्नि सापकोटाको मात्र उम्मेदवारी परेको छ ।

प्रमुख प्रतिपक्षी दल नेपाली कांग्रेस तथा अन्य प्रतिपक्षी दलहरूको तर्फबाट उम्मेदवारी नपरेपछि सापकोटा निर्विरोध निर्वाचित हुने भएका छन् ।


Advertisement

पूर्व सभामुख सुवास नेम्वाङको प्रस्ताव तथा पूर्व सभामुख ओनसरी घर्ती, नेकपा प्रमुख सचेतक देव गुरुङ र राजपा सांसद लक्ष्मणलाल कर्णको समर्थनमा सापकोटाले उम्मेदवारी मनोनयन दर्ता गराएका हुन् ।

उम्मेदवारी मनोनयन दर्तापछि सञ्चारकर्मीलाई संक्षिप्त प्रतिक्रिया दिँदै सापकोटाले संसद्को गरिमा कायम राख्न भगिरथ प्रयत्न गर्ने बताए ।


Advertisement

एक मात्र उम्मेदवारी परेपनि सापकोटा सभामुखमा निर्वाचित भएको घोषणा भने निर्वाचन तोकिएको दिन माघ १२ गते नै हुनेछ ।

सभामुख निर्वाचनसम्बन्धी व्यवस्था नेपालको संविधानको धारा ९१ तथा प्रतिनिधिसभा नियमावली २०७५ को नियम ७ मा उल्लेख छ ।

नियमावलीअनुसार एक मात्र प्रस्ताव परेको खण्डमा प्रस्तावक र समर्थकले बोलिसकेपछि सभाको अध्यक्षता गर्ने व्यक्तिले प्रस्तावित सदस्य सभामुखमा निर्विरोध निर्वाचित भएको घोषणा गर्नेछन् ।

नियमावलीको नियम (७) उपनियम (३) मा भनिएको छ –

उपनियम (२) बमोजिम प्रस्तावको सूचना प्रस्तावक सदस्यले बैठकमा प्रस्तुत गरेपछि समर्थक सदस्यले समर्थन गर्नेछ । त्यस्तो प्रस्तावको एक मात्र सूचना प्राप्त भएमा समर्थक सदस्यले बोलिसकेपछि अध्यक्षता गर्ने व्यक्तिले प्रस्तावित सदस्य सभामुख पदमा  निर्विरोध निर्वाचित भएको घोषणा गर्नेछ ।

संसद् सचिवालयमै काम गर्ने महिला कर्मचारीमाथि यौन दुर्व्यवहार गरेको आरोपमा निवर्तमान सभामुख कृष्णबहादुर महराले राजीनामा दिएपछि गत असोज दोस्रो साताबाट सभामुख पद रिक्त थियो ।

लामो रस्साकस्सी र आन्तरिक विवादपछि नेकपाले सापकोटालाई सभामुखको उम्मेदवार बनाउने निर्णय गरेको थियो ।

सिन्धुपाल्चोकबाट प्रत्यक्ष निर्वाचित सांसद सापकोटा नेकपा अध्यक्ष पुष्पकमल दाहाल ‘प्रचण्ड’का विश्वास पात्र मानिन्छन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्