सुर्खेत, ८ फागुन – के तपाई मुगुको रारा जाने सोचमा हुनुहुन्छ ? यदि हो भने अब प्रदेश नम्बर ६ को राजधानी सुर्खेत आउनुहोस् । यहाँहरुका लागि होटल व्यवसायी संघ सुर्खेतले न्यनतम दररेटमा पर्यटकीय गन्तब्यका लागि प्याकेज निर्माण गरिरहेको छ ।

प्रदेशमा सरकार बनिसकेको र सरकारले गतिवधि समेत शुरु गरेकाले वीरेन्द्रनगरका होटल व्यवसायीहरु पनि पर्यटनलाई ध्यान राख्दै विभिन्न योजनाहरु बनाउन लागि परेका छन् । 

फागुनको दोस्रो साताबाट सुरु हुने राराको सिजनलाई मध्यनजर गर्दै सुर्खेत, दैलेख, जुुम्ला र रारा क्षेत्रका स्थानहरुमा पर्यटक लैजाने तयारीका साथ गृहकार्य भइरहेको होटल व्यवसायी संघ सुर्खेतका अध्यक्ष तर्कबहादुर शाहीले बताए । उनका अनुसार अब रारा जाने यात्रुले प्याकेजमा नै दैलेख, जुम्ला, र सुर्खेतका पर्यटकीय स्थलहरुको समेत अवलोकन गर्न पाउनेछन् । 

प्रदेश सरकारले पर्यटन क्षेत्रलाई पहिलो प्राथमिकतामा राखेको र पर्यटनलाई समृद्धिको आधार मानेकाले आफूहरु पनि त्यहि मार्गमा हिडेर प्रदेशलाई समृद्ध बनाउन लाग्ने उनको भनाई  थियो ।

‘रारा जाने पर्यटकहरुले धेरै दुःख पाउने गुनासाहरु हामीले सुनेका छौं’ उनले लोकान्तरसँग भने, ‘अब ती गुनासाहरु नआउन दिन र पर्यटकले चाहेजस्तो वातावरण बनाउन हामीहरु गृहकार्य गर्दैछौं ।’  

शाहीले काठमाण्डौं वा अन्य जिल्लाबाट आएका गाडीहरुले कर्णाली राजमार्गमा विग्रेर धोका दिने, ड्राइभरले गाडी चलाउन नसकेर गाडी रारामै छोडेर फर्किने, आएका पर्यटकहरु अन्यत्र जान नपाउने जस्ता समस्याहरु आएकाले

त्यसको समाधान गर्न आफूहरुले सुर्खेत देखि रारासम्मको लागि न्यूनतम दरमा पर्यटक ल्याउने र लैजाने व्यवस्था गर्न लागेको बताए ।

‘हामीले यो सेवा सुरु गरेको खण्डमा पर्यटकहरुलाई दैलेखको पञ्चकोशी क्षेत्र, जुम्ला, मुगुको राराताल, सुर्खेतको बुलबुले ताल, काँक्रेविहार आदि क्षेत्रको एकै चरणमा भ्रमण गराउने छौं ।’ उनले भने, ‘पर्यटकहरुलाई कुनै पनि समस्यामा नपार्ने गरि न्युनतम रेटमा सेवा दिनेछौं ।’ अध्यक्ष शाहीले आफूहरुले पर्यटकलाई खाने, बस्ने उपयुक्त स्थानको समेत व्यवस्था मिलाउने बताए । 

आन्तरिक पर्यटकका लागि गोठीकाँडामा सञ्चालनमा आएको स्टे भ्याली भ्यू रिसोर्टले रारा जाने यात्रुहरुका लागि २५ प्रतिशत छुट दिने घोषणा गरेको छ । त्यो छुट खाना, कोठा भाडा सबैमा लागु हुने रिर्सोटले जनाएको छ । 

सुर्खेतमा रारा जाने पर्यटकहरुको भिड बढ्न थालेपछि विभिन्न होटलहरुले छुटको घोषणा गर्दै पर्यटक तान्न कस्सिएका छन् । रारा जाने सिजन करिब करिब सुरु भएको छ । आगामी कात्तिकसम्म रारा जानेहरुको लर्को लागिरहन्छ ।