‘मेरो रगतमै अभिनय छ, म त अभिनय गरेरै मर्ने हो’

मंसिर १५, २०७५

काठमाडौं – आजभन्दा १७ वर्ष अगाडि अभिनेता भुवन केसी एक सांस्कृतिक कार्यक्रममा प्रमुख अतिथिका रुपमा उपस्थित थिए । 

सोही कार्यक्रममा अभिनयसँगै नृत्य गर्दै थिए ६ वर्षीय बालक । ती बालकको नृत्य र अभिनयमा भुवनको नजर पर्यो ।


ADVERTISEMENT

चलचित्र बनाउने तयारीमा रहेका भुवनले ती बालकलाई आफ्नो चलचित्रमा अभिनय गराउन चाहे । भुवनलाई प्रभावित पार्ने ती बालक थिए अहिलेका व्यस्त अभिनेता सलोन बस्नेत ।

लोकान्तरसँगको कुराकानीमा सलोन सम्झन्छन्, ‘मेरो प्रस्तुति भुवन अंकलले मन पराएपछि स्टेजमै चढेर आफ्नो चलचित्रमा खेलाउने घोषणा गर्नुभयो ।’ भुवनको ‘नेपाली बाबु’मा सलोनले अभिनय गरे ।

त्यसपश्चात् सलोन बालकलाकारका रुपमा ३ दर्जन बढी चलचित्रमा अभिनय गरे । आफ्नोपन, आशिर्वाद, आफन्त, हामी तीन भाइ लगायत चलचित्र उनी बालकलाकारको रुपमा अभिनित सफल चलचित्र हुन् । एउटा स्टेज कार्यक्रमले जुराएको संजोगले आज ‘नेपाली बाबु’का बालकलाकार अहिलेका व्यस्त अभिनेताका रुपमा स्थापित छन् ।

पढाइले ६ वर्ष ‘ग्याप’

बाल कलाकारको रुपमा सलोन चलचित्रमा अभिनय गर्दै गए । साथमा पढाइलाई पनि सँगसँगै लैजानुपर्ने थियो । सलोनका अनुसार बाल कलाकारको रुपमा उनले अभिनय गरेको पछिल्लो चलचित्र थियो – हामी तीन भाइ ।

‘हामी तीन भाइमा अभिनय गर्दा म कक्षा ८ मा पढ्दै थिए । त्यसपछि म अभिनयभन्दा पढाइमा केन्द्रित भए,’ उनी झण्डै ६ वर्ष अभिनयलाई एकापट्टि राखेर पढाइमा केन्द्रित भए ।

६ वर्षको ग्यापपछि उनी सुनिल रावलले निर्माण गरिरहेको ‘होस्टेल’ मार्फत् अभिनेताका रुपमा चलचित्र क्षेत्रमा फर्के । फरक कन्सेप्टमा निर्माण भएको चलचित्र ‘होस्टेल’लाई दर्शकले रुचाए । सँगै अभिनेता सलोन पनि दर्शकको नोटिसमा परे ।

दर्शकमा मात्र होइन, उनी निर्माता निर्देशकको नजरमा पनि पर्दै गए । होस्टेलपछि ‘गाजलु’, ‘लभसब’, ‘ए मेरो हजुर २’, ‘बाबु कान्छा’, ‘जय भोले’ लगायतका चलचित्र हुँदै हाल उनी अभिनित नयाँ चलचित्र ‘सुश्री सम्पत्ति’ प्रदर्शनको तयारीमा छ ।

सहायकमा फिट, सोलोमा भएनन् हिट

सलोन अधिकांश चलचित्रमा सहायक भूमिकामा देखिन्छन् । जुन चलचित्र सफल पनि छन्, सँगै सलोनको प्रस्तुतिलाई पनि दर्शकले रुचाउँदै आएका छन् । उनको सहायक भूमिका रहेको होस्टेल, गाजलु, ए मेरो हजुर २ लगायतका चलचित्र सफल हुन् ।

चकलेटी अनुहारका सलोन कमेडी शैलीमा प्रस्तुत हुन्छन्, अनि उनको भूमिकामा दर्शक रमाउँछन् । तर दुर्भाग्य नै मान्नुपर्छ सलोन सोलो हिरोका रुपमा प्रस्तुत भएका चलचित्र भने असफल छन् । जसमा ‘आधापेज’, ‘बाबुकान्छा’लाई लिन सकिन्छ । 

सलोन भन्छन्, ‘म धेरै चलचित्रमा सहायक क्यारेक्टरमा छु । यसले मेरो करिअरलाई भने असर गरेको छैन ।’ सलोन सहायक भएपनि आफ्नो प्रस्तुति बलियो छ भने काम गर्नु नराम्रो नभएको बताउँछन् ।

‘मलाई क्यारेक्टर सानो–ठूलो भन्ने नै लाग्दैन । क्यारेक्टर हेर्छु, बलियो छ भने ओके हुन्छ,’ सलोन भन्छन् । तर आफू सोलो क्यारेक्टरमा चल्न नसक्नुमा दुःखी भने देखिन्छन् । ‘लिड रोलमा अभिनय गरेका चलचित्र मैले छान्न सकिन । त्यो मेरो कमजोरी हो,’ सलोन भन्छन् ।

‘रगतमै अभिनय छ, अभिनय गरेरै मर्ने हो’

निर्देशक तथा कलाकार शोभित बस्नेतका छोरा हुन् सलोन । सलोनका काका जयकिशन बस्नेत पनि अभिनय, निर्माण तथा निर्देशनमा सक्रिय छन् । बुवा र काका त्यो बेला अझ सक्रिय थिए, सलोन बाल्यकालमा थिए । 

पारिवारिक पृष्ठभूमि नै कलाकारिता भएकाले पनि सलोनमा सानैदेखि अभिनयप्रति रुचि थियो । साथमा रुचि पूरा गर्न पारिवारको साथ र सहयोग । सलोन सानैदेखि बुवा र काकासँग स्टेज कार्यक्रममा प्रस्तुति गर्थे । त्यसैक्रममा उनको भेट भुवनसँग भएको थियो ।

सलोन आफू अभिनयकै लागि जन्मिएको बताउँछन् । ‘म बाल कलाकारका रुपमा उदाए । अहिलेसम्म चलचित्र क्षेत्रभन्दा बाहिर कुनै पनि काम गरेको छ्रैन,’ सलोन भन्छन्, ‘सानैदेखि अभिनय गरें, अभिनय बुझें, अनि अभिनयमै रमाए । म त अभिनय गरेरै मर्ने हो ।’ यसकारण पनि अभिनय उनको निर्विकल्प विगत थियो, वर्तमान हो, सँगै भविष्य पनि ।

मंसिर १५, २०७५ मा प्रकाशित

सुशील नेपाल

नेपाल कला, साहित्य र मनोरञ्जनमा कलम चलाउँछन् ।

लेखकबाट थप...

प्रतिक्रिया दिनुहोस