नेकपा एमालेका अध्यक्ष केपी शर्मा ओलीले देश सधैंभरि गठबन्धन र समीकरणबाट नचल्ने भएकोले देशलाई २०८४ सालमा बहुमत ल्याउने गरी तयारी थालेको बताएका छन् ।​

सबल राष्ट्रिय शक्ति रहेको एमालेलाई निर्णायक तहमा पुर्‍याउन मिसन २०८४ को कुरा गरिएको उनले बताए ।

बुधवार इलामको चुलाचुलीमा एमालेको चुनावी सभालाई सम्बोधन गर्दै ओलीले देश बनाउनका लागि आफूहरूको पार्टीले मिसन ०८४ कुरा गरेको बताएका हुन् ।

‘देश बनाउनका लागि हाम्रो पार्टीले मिसन ०८४ भनेको छ, मिसन ०८४ भनेको निर्णायक राष्ट्रिय शक्तिको रुपमा हामी विकास गर्नुपर्छ । अनेक प्रकारको जोडघटाउ गरेर, मिलजुल गरेर बहुमत पुर्‍याएर पनि काम छैन । सधैं गठबन्धन, सधैं समीकरणबाट देश चल्दैन । सबल राष्ट्रिय शक्तिलाई निर्णायक तहमा पुर्‍याएर मात्र देश बन्छ’, ओलीले भने । 

ओदीले एमाले सरकार भएको बेला देशमा विकासको लहर चलेको दावी गरे । ‘हामीलाई अनेक षडयन्त्र र प्रपञ्चबाट हटाइयो, त्यसपछि देशमा पहिरो गएकै गइ भयो । तीन वर्षदेखिको पहिरो रोक्न खोजेका छौं, गत वर्ष पनि प्रयास गरिएको थियो, तर भत्कियो । यसवर्ष रोक्न खोजेका छौं', उनले भने ।

ओलीले इलाममा सुहाङ नेम्वाङले चुनाव जिते रोकिएका विकास निर्माणको काम सम्पन्न हुने बताए ।