टिकलीगढ, खैरिया १३ मंसिर– पञ्चायतको समयदेखि प्रजातन्त्र र गणतन्त्रमासमेत सत्ताका माहिर खेलाडी दीपक बोहराले रुपन्देही ३ मा वामपन्थी उम्मेदवारलाई चुनौती दिइरहेका छन् । 

यस क्षेत्रमा वाम गठबन्धनका तर्फबाट नेकपा एमालेका बौद्धिक नेताको छवी बनाएका घनश्याम भुसाल चुनावी प्रतिष्पर्धामा छन् । बोहरा कांग्रेस नेतृत्वको शेरबहादुर देउवा सरकारका बहालवाला मन्त्री हुन भने भुसाल एमालेका उपमहासचिव हुन् । 

२०७० सालको संविधानसभा निर्वाचनमा यसै क्षेत्रबाट विजयी भएका बोहरालाई यसपटक नेपाली कांग्रेसको समर्थन छ । बिगतमा बालकृष्ण खाँडले चुनाव जितेको क्षेत्र पनि अहिले क्षेत्र नम्बर २ मा परेको छ । बोहोराले भैरहवा आसपासको क्षेत्र आफूले देख्न लायक बनाएको दावी गर्छन् ।

‘२०३७ सालदेखि यो क्षेत्रको विकासका लागि निरन्तर खटिएको छु, यो क्षेत्रमा बनेका बाटो, पुल र सिंचाइका नहर मेरै योगदान हुन्’ बोहोराले दावी गरे । उनले वामपन्थी गठनबन्धनका कारण आफूले दवाव महसुश नगरेको दावी गरे । 

‘वामपन्थी गठबन्धन हौवा मात्र हो, फेरिपनि कांग्रेस पहिलो पार्टी बन्छ र लोकतान्त्रिक गठबन्धनको सरकार बन्छ हेर्दै जानुहोला’ बोहोराले दाबी गरे । 

गत संविधानसभा निर्वाचनमा रुपन्देहीको सिद्धार्थनगर नगरपालिाकामा नेकपा एमाले विजयी भएको थियो । एमाले र माओवादीको भोट जोडदा वामपन्थीको पल्लाभारी देखिन्छ । प्रदेश सभातर्फ बामपन्थी गठबन्धनका तर्फबाट माओवादीका विश्वास बराल र एमालेका तुलसीप्रसाद चौधरी चुनावी प्रतिष्पर्धामा छन् । 

नेपाली कांग्रेसको तर्फबाट देवि चौधरी र हरिध्वज मल्ल प्रदेश सभाका उम्मेदवार छन् । संघीय समाजवादी फोरमले प्रतिनिधि सभातर्फ महेन्द्र यादव तथा राष्ट्रिय जनमुक्ति पार्टीले सूर्यकुमार सारु मगर र राष्ट्रिय जनमोर्चाले भानु केसीलाई उम्मेदवार बनाएको छ । 

२०७० सालको संविधानसभा चुनावमा एमाले नेता भुसाल कांग्रेसका बालकृष्ण खाँडसंग झिनो मतअन्तरले पराजित भएका थिए । यसपटक भने चुनाव जित्नेमा भुसाल विश्वस्त छन् । 

बामपन्थी र लोकतान्त्रिक गठबन्धनबीच तीब्र प्रतिष्पर्धा रहेको स्थानीय मतदाताहरु बताउछन् । पाँच नम्बर प्रदेशको राजधानी बुटवल कि दाङ भन्ने बिषय पनि यहाँको चुनावी एजेण्डा बनेको छ । 
स्थानीय मतदाता रामप्रित हरिजन विकास गर्ने नेतालाई आफूहरुले भोट दिने बताए । 

तर स्थानीय चुनावको अंक गणितको आधारमा बोहोराभन्दा भुसाल अगाडि छन् । राप्रपा र कांग्रेसको भन्दा एमाले र माओवादीको भोट झण्डै पाँच हजारले बढी छ । बोहोराले आफूले चुनाव जित्ने दावी गरेपनि भुसाले चाहिँ सचेत मतदाताको मतका आधारमा आफूले चुनाव जित्ने दावी गरे ।

चुनावी कार्यक्रमहरुमा निकै व्यस्त रहेका भुसालले मतदाता प्रभावित गर्ने भित्री खेलहरु नभएमा आफ्नो जीत सुनिश्चित भएको दावी समेत गर्ने गरेका छन् । विकट क्षेत्रका मत प्रभावित हुन सक्ने भएकोले एमालेले विभिन्न रणनीति प्रयोग गरेर वाच समेत गरिरहेको छ । मतदाताले सफा चरित्र भएको व्यक्तिलाई भोट दिने अपेक्षा समेत भुसालले गरेका छन् ।