राष्ट्रिय सभा सदस्य मृगेन्द्रप्रसाद सिंह यादव दोहोरो नागरिकतासम्बन्धी विवादमा मुछिएका छन् ।

जनता समाजवादी पार्टी (जसपा)नेपालबाट निर्वाचित यादव सप्तरीको बोदे बर्साइन नगरपालिका वडा नम्बर ५ का बासिन्दा हुन् । तर, उनले भारतको बिहारबाट समेत मतदाता परिचयपत्र प्राप्त गरेको देखिएको छ ।

बिहारको मधुबनी जिल्लाअन्तर्गत बसहा पञ्चायतको बबुराही थानाबाट उनीसहित उनका दाजुभाइ, श्रीमतीसहितले भारतीय मतदाता परिचयपत्र बनाएको पाइएको छ ।

मृगेन्द्रसँगै मधेश प्रदेश सभा सदस्य समेत रहेका उनका भाइ अनिरुद्धप्रसाद सिंह यादव पनि यस प्रकरणमा मुछिएका छन् ।

भारतको पञ्चायत आमनिर्वाचन नामावली, २०२१ (बिहार)को मतदाता विवरणमा समेत उनीसहित मृगेन्द्रको परिवारका सदस्यहरूको नाम रहेको पाइएको छ ।

मतदाता नामावली सूची ४५३ मा यादवको मतदाता नम्बर डब्लुसीडी १३७५७२४ रहेको छ । उनले त्यहाँ आफ्नो श्रीमतीको नाम सुनिता देवी राखेका छन् भने नेपालमा श्रीमतीको नाम सरिता सिंह यादव राखेका छन् ।

भारतीय मतदाता समेत रहेको हुनाले राष्ट्रिय सभा सदस्य पदबाट पदमुक्त गरी पाऊँ भन्दै युवराज सफलले राष्ट्रिय सभा अध्यक्ष गणेशप्रसाद तिमिल्सिनासमक्ष लिखित उजुरी नै दिएका छन् । भारतीय मतदाता पहिचान पत्रसहितको विवरण प्रमाणको रूपमा पेस गर्दै सफलले उजुरी दिएका हुन् ।

यस विषयमा राष्ट्रिय सभा सदस्य मृगेन्द्रप्रसाद सिंह यादवसँग कुरा गर्दा विगतमा भारतका शिक्षकहरूले आफू तथा आफ्नो परिवारका सदस्यहरूको नाम भारतीय मतदाता पहिचान पत्रमा उल्लेख गराइदिएको स्वीकारे । यद्यपि आफूले कहिल्यै भोट नहालेको उनको भनाइ छ ।

'भारतको बसहामा हाम्रो घर र जग्गाजमिन छ, त्यसैले त्यहाँका केही शिक्षकले भोटर लिस्टमा हाम्रो परिवारका सदस्यहरूको पनि नाम लेखाइदिएका हुन् । तर, मैले त्यहाँ कहिल्यै भोट खसालेको छैन,' यादवले  लोकान्तरसँग भने, 'त्यहाँ हाम्रो मौजा थियो । धेरैजसो जग्गाजमिन बेचिसके पनि अझै धेरै जग्गा बाँकी नै छ ।'

भारतको बसहामा सयौं बिघा जग्गा मौजा पाएको तथा अहिले पनि १७/१८ बिघा बाँकी रहेको उनले खुलाए । 'त्यहाँ खेतिपाती अहिले पनि गर्छु । खेतिपाती गर्ने कामका लागि म्यानेजरसहितका स्टाफहरू राखेको छु,' राष्ट्रिय सभा सदस्य यादवले लोकान्तरसँग भने ।

आफूहरू ५ दाजुभाइ (मृगेन्द्र, व्रिजेन्द्र, गजेन्द्र, अनिरुद्ध  र दिलिप) रहेको र पाँचै दाजुभाइको नाममा भारतमा जनही १७ देखि १८ बिघा जग्गा रहेको मृगेन्द्रले बताए ।

नेपालमा पनि राजा महेन्द्रले २०१३ सालमा २२ वटा मौजा दिएको उनले बताए ।

'नेपालमा चन्द्रावती स्कूलको नाममा २०१३ सालमा तत्कालीन राजा महेन्द्रले मेरो बुवा शत्रुघनप्रसाद यादवलाई २५० बिघा मौजा प्रदान गर्नुभएको थियो,' मृगेन्द्रले थपे, 'अहिले पनि स्कूलको नाममा १६१ बिघा जग्गा बाँकी छ ।'

नेपालमा आफ्नो नाममा अझै पनि १० बिघा जति जग्गा रहेको उनले बताए ।

आफ्नो बुवालाई तत्कालीन राजा महेन्द्रले सिंहको टाइटल दिएको हुनाले आफूहरूले कुमार यादवको सट्टामा प्रसाद सिंह यादव लेख्ने गरेको उनको भनाइ छ ।

'मेरो बुवा राष्ट्रिय पञ्चायत सदस्य पनि बन्नुभएको थियो । सूर्यबहादुर थापाको क्याबिनेटमा उहाँ सिञ्चाइ सहायक मन्त्री पनि बन्नुभएको थियो,' उनले थपे, 'अहिले आएर दोहोरो नागरिकताको विवाद झिक्नु भनेको मलाई दु:ख दिनु मात्र हो ।'