पर्यटकीय क्षेत्र पाल्पाको रामपुरमा दृश्यावलोकन स्तम्भ निर्माण शुरू गरिएको छ ।

रामपुर नगरपालिका–४ को बरडाँडामा पर्यटकीय क्षेत्र विकास गर्ने उद्देश्यका साथ दृश्यावलोकन स्तम्भ निर्माण कार्य अगाडि बढाइएको छ ।

नगरपालिकाको सहयोगमा बहुवर्षीय योजनाअनुरूप करीब ५० फिट अग्लो (४ तलाको) दृश्यावलोकन स्तम्भ निर्माण गर्न १६ लाख रुपैयाँ रकमबाट काम थालनी गरिएको समितिका अध्यक्ष अमिर रानाले बताए ।

उनका अनुसार निर्माण सम्पन्न गर्न करीब ६० लाख रुपैयाँ लाग्ने अनुमान गरिएको छ ।

बेझाड बजारदेखि सवारीसाधनमा करीब १० मिनेटको समयमा पुग्न माथिल्लो भेगमा रहेको बरडाँडा क्षेत्रबाट कालीगण्डकीबेंसीका धेरै ठाउँको दृश्यावलोकन गर्न सकिने छ । रामपुरमा बाह्य पर्यटक भित्र्याउनका लागि दृश्यावलोकन स्तम्भ निर्माण शुरू गरिएको नगर प्रमुख रमणबहादुर थापाले बताए ।

अहिले भने दृश्यावलोकन स्तम्भ निर्माणको योजना परेपछि जग्गा खरिद गर्न ग्राहक आउने क्रम बिस्तारै बढ्दैछ । दृश्यावलोकन स्तम्भ निर्माणकार्यले गाउँमा विकासको लहर अगाडि बढेको अनुभूति स्थानीयले गरेका छन् ।

दृश्यावलोकन स्तम्भ निर्माण गरिने क्षेत्रमा उद्यान लगायतका विभिन्न पर्यटकीय पूर्वाधार निर्माण गर्ने समितिको योजना छ । समितिले अबको ५ वर्षभित्र काम सक्ने गरी निर्माण अगाडि बढाएको जनाएको छ ।

सो क्षेत्रमा क्षेत्रमा अन्य पूर्वाधार विकासका लागि स्थानीय वसन्तराम ठाडा, चेतनाथ पङ्गेनी, विष्णुबहादुर सेनले २/२ आना जग्गा सहयोग गरेका छन् ।