नेपाली हास्यव्यंग्य साहित्यका विराट प्रतिभा भैरव अर्यालको ८६ औं जन्मजयन्तीको अवसरमा मंगलवार राजधानीमा उनको साहित्यिक योगदानमाथि चर्चा गरिएको छ । 

भैरव पुरस्कार गुठीले आयोजना गरेको कार्यक्रममा वक्ताहरूले हास्यव्यङ्ग्य साहित्यमा अर्यालका रचनाहरू कालजयी भएको बताए । 

नेपाली साहित्यबाहेक पत्रकारिताको क्षेत्रमा पनि उनको अमूल्य योगदान रहेको सहभागीले बताए । 

अर्यालको प्रेरणाबाट धेरै साहित्यकार तथा पत्रकारहरू जन्मिएको भन्दै उनीहरूले  राज्यबाट अर्यालको योगदानको कदर हुन नसकेको गुनासो पनि गरे । 

कार्यक्रममा वरिष्ठ साहित्यकार तथा पत्रकार विजय चालिसे, वरिष्ठ साहित्यकार गोविन्दप्रसाद घिमिरे ‘वेदमणि’, साहित्यकारहरू बद्रि अर्याल, गोपाल बराल, वसन्त रिजाल, सागरराज सुवेदीलगायतले अर्यालको जीवनका विविध पाटोबारे प्रकाश पारे । 

सोही अवसरमा भैरव स्मृति भवनमा निर्मित सभाकक्ष (हास्यव्यङ्ग्यकार वासुदेव लुइँटेल, आख्यानकार रमेश विकलमा समर्पित) तथा अत्याधुनिक पुस्तकालयको बागमती प्रदेशका सभासद् छिरिङ दोर्जे लामाले उद्घाटन गरे । 

१९९३ असोज ५ गते ललितपुरको कुपण्डोलमा जन्मिएका अर्यालले केवल ४० वर्षको उमेरमा २०३३ साल असोज १९ गते देहत्याग गरेका थिए । अर्यालका जयभुँडी, काउकुती, इतिश्री, दश अवतार, गलबन्दी, उपवन लगायतका कृतिहरू लोकप्रिय छन् ।