प्रमुख प्रतिपक्षी दल नेकपा एमालेले निलम्बनमा परेका प्रधानन्यायाधीश चोलेन्द्र शमशेर जबरालाई बोकेर हिँड्ने पार्टीको नीति नभएको प्रस्ट पारेको छ । 

चुनाव सार्ने नियतले महाभियोगको कुरा आएकाले विरोध गर्नुपरेको एमालेले बताएको छ । 

सोमवार बसेको एमाले संसदीय दलको बैठकमा अध्यक्ष केपी शर्मा ओलीले परमादेशको नेतृत्व गरेका चोलेन्द्रलाई बोक्ने पार्टीको नीति नभए पनि गठबन्धनको गलत नियतको विरोध गर्नुपरेको बताएका हुन् । 

आवश्यक पर्दा सडक र कानूनी क्षेत्रबाटै प्रतिवाद गरिने उनले बताए । 

‘अहिले प्रधानन्यायाधीशका विरुद्ध आएको महाभियोग, निर्वाचनलाई सार्न र टार्न खोज्ने किसिमले आएको छ । चोलेन्द्रले राम्रो काम गर्नुभएको छ, बोकेर हिँड्नुपर्छ भन्ने छैन । थुप्रै चार्ज उहाँमाथि छ । उहाँले नै परमादेशको नेतृत्व गर्नुभएको थियो,’ ओलीको भनाइ उद्धृत गर्दै एमाले संसदीय दलका प्रमुख सचेतक विशाल भट्टराईले भने, ‘अदालतलाई निरन्तर गिजोलिरहने, निर्वाचन सार्ने र एमसीसी पास गर्ने नियतबाट आएकाले विरोध गर्नुपरेको हो ।’ 

बैठकमा नेताद्वय भीम रावल र घनश्याम भुसालले चोलेन्द्रलाई बोकेर हिँड्दा पार्टीलाई घाटा हुने बताएका थिए । जवाफमा ओलीले चोलेन्द्रलाई बोकेर हिँड्ने पार्टीको नीति नभएको स्पष्ट पारेका थिए ।

यसअघि एमाले सचिवालय बैठकले महाभियोगविरुद्ध प्रतिवाद गर्ने निर्णय गरेको थियो । 

ओलीले असार २८ गते परमादेश जारी गर्ने न्यायाधीशविरुद्ध महाभियोग लगाउनेबारे पार्टीले आवेगमा नभई सुझबुझपूर्ण निर्णय गर्ने बताएका थिए ।