२९ जेठ २०८३, शुक्रबार
सरकारले वैशाख ३० गते स्थानीय तह निर्वाचन हुने मिति घोषणा गरेसँगै इटहरीमा चुनावी सरगर्मी बढेको छ ।
इटहरीमा ठूला ३ दलका झण्डै १ दर्जन नेता चुनावी मैदानमा देखिन थालेका छन् ।
गत स्थानीय तह निर्वाचनमा इटहरी उपमहानगरपालिकामा एमालेले बहुमत सहितका जनप्रतिनिधि जितेको थियो । इटहरी उपमहानगरपालिकामा एमालेका द्वारिकलाल चौधरी मेयर र लक्ष्मी गौतम उपमेयर विजयी भएका थिए ।
चौधरीले २२ हजार ६८९ मत ल्याएर विजयी हुँदा गौतमले २१ हजार ८४२ मत पाएकी थिइन् । चौधरीका प्रतिद्वन्द्वी नेपाली कांग्रेसका रोहितकुमार प्रसाईंले १९ हजार ९८५ र गौतमकी प्रतिद्वन्द्वी कांग्रेसकी विमला ढकालले १८ हजार ३५२ मत ल्याएकी थिइन् ।
मेयरमा विजयी चौधरीले स्थानीय चुनावमा ‘ह्याट्रिक’ गरेका हुन् । चौधरीले २०४९ साल र २०५४ सालमा हाँसपोसा गाउँ विकास समितिको अध्यक्ष जितेका थिए । इटहरी उपमहानगरपालिका हाँसपोसासहित पकली, एकम्बा र खनार मिलेर बनेको हो ।
इटहरीमा एमालेले मेयर/उपमेयरसहित ८ वटा वडामा जितेको थियो । एमालेले वडा नम्बर २, ४, ५, ९, १८, १९, १३ र १४ जितेको थियो ।
आसन्न स्थानीय चुनाव नजिकिँदै गर्दा नेकपा एमालेभित्र इटहरीको मेयरका लागि केही नेताको नाम चर्चामा रहेको छ । उपमेयर लक्ष्मी गौतम समेत मेयरका लागि मैदानमा आउने नेताहरू बताउँछन् । उपमेयर भएकाले मेयरमा आफ्नो नाम आउनु स्वाभाविक भएको उनले बताइन् ।
१०औं महाधिवेशनबाट पार्टी केन्द्रीय सदस्य भएकी गौतमको आकांक्षा बलियो रहेको एमाले सुनसरीका एक नेताले बताए । मेयर द्वारिकलाल चैधरी पटक–पटक विवादमा तानिँदा समेत उपमेयर गौतम खासै विवादमा परेकी छैनन् ।
पार्टी नगर कमिटी अध्यक्ष याम सुब्बाको नाम पनि चर्चामा छ । गत चुनावमा मेयरका आकांक्षी देखिएका रामप्रसाद चौलागाईं यसपालि पनि चर्चामा छन् । बहालवाला मेयर द्वारिकलाल चौधरीले समेत इच्छा देखाएको नेताहरू बताउँछन् ।
पत्रकारको ‘नाकको डाँडी’ भाँच्नेदेखि पत्रकारलाई लोपार्ने लगायतका विभिन्न काण्डमा चर्चामा आएका चौधरीले पुनः मेयरका लागि लबिङ शुरू गर्न थालेका छन् । ‘उहाँ अहिले भाले हो कि पोथी हो भन्ने अवस्थामा हुनुहुन्छ,’ एक नेताले भने, ‘एमाले कि समाजवादी भनेर छुट्याउनै समस्या भएको छ ।’
नेकपा एकीकृत समाजवादीका अध्यक्ष माधवकुमार नेपाललाई घरमै लगेर भात खुवाउने तथा नगरका अन्य कार्यक्रममा समेत माधव नेपाललाई बोलाएपछि एमाले उनीसँग सशंकित भएको छ ।
कांग्रेसमा मेयरका लागि ४ जनाको नाम चर्चामा छ । गत चुनावमा मेयरका आकांक्षी रोहित प्रसाई पुनः लड्ने तयारी गरिरहेका छन् । प्र्रसाईले चुनाव लक्षित गतिविधि समेत बढाएका छन् । स्व. आमाबुवाका नाममा फाउन्डेसन खोलेर गरीब तथा विपन्न परिवारलाई सिरक–डसना जस्ता सामग्री उनले बाँडेका छन् ।
मेयरका आकांक्षीमा भीम पौडलेको नाम पनि चर्चामा छ । प्रसाई र पौडेल दुवै जना महाधिवेशन प्रतिनिधि हुन् । पौडेल उद्योग वाणिज्य संघ इटहरीका अध्यक्ष हुन् भने प्रसाई पूर्व अध्यक्ष हुन् । गत प्रदेशसभा चुनावमा पराजित बनेका हेमकर्ण पौडेलले पनि मेयरको आकांक्षा देखाएका छन् ।
नेकपा नेकपा माओवादी केन्द्र र एकीकृत समाजवादी ‘हेर र पर्ख’को अवस्थामा छन् । नेकपा एकीकृत समाजवादीका नेता तथा खेलकुद विकास समितिका पूर्व सदस्य सचिव केशवकुमार बिष्टको नाम पनि चर्चामा छ । पूर्व मुख्यमन्त्री समेत रहेका भीमप्रसाद आचार्यको गृहजिल्ला सुनसरीमा एकीकृत समाजवादीको राम्रो पकड रहेको समाजवादीका नेताहरू बताउँछन् ।
गत स्थानीय चुनावमा माओवादीको अवस्था कमजोर देखिएपछि चुनावी गठबन्धन गरेर अगाडि बढ्ने रणनीति रहेको माओवादी नेताहरू बताउँछन् ।
