प्रमुख प्रतिपक्षी दलका नेता एवं नेकपा एमालेका अध्यक्ष केपी शर्मा ओलीले सरकारको विरोध गर्ने सांसदको सातो लिन खोजिएको आरोप लगाएका छन् ।

मंगलवार प्रतिनिधिसभा बैठकमा समय लिएर ओलीले कांग्रेस सांसद डा. सुनिल शर्मा र स्वतन्त्र सांसद अमरेशकुमार सिंहलाई तर्साएर सांसदको सातो लिन खोजिएको ओलीले आरोप लगाए । 

‘क्विन्टलका क्विन्टल सुन तस्करी गर्ने पक्राउ पर्दैनन्, मेडिकल कलेज सञ्चालन गरेको एक सांसदलाई पक्राउ गरिन्छ । केही बोलेको आरोपमा अमरेशकुमार सिंहलाई पुर्जी काटियो, सम्पत्ति छानबिन गर्ने भनेर,’ ओलीले भने, ‘२०४६ सालको सर्टिफिकेट छानबिन थुनेर गर्नुपर्छ ? सांसदको पनि सातो लिने, कोही बोल्यो कि खबरदार सुनिल शर्मा बनाइदिन्छु भनेर ? यो सांसदको सातो लिन खोजेको होइन ?’ 

ओलीले मुस्कान खातुनमाथि एसिड आक्रमण गर्नेलाई आममाफी दिइएको भन्दै आपत्ति जनाए ।

‘फागुन १ गतेको उत्सव भनेर छाड्यो कि संविधान दिवसको नाममा ? अदालतले १० वर्ष फैसला गरेको व्यक्तिलाई  सरकारले छाडिसक्यो, एसिड आक्रमण पीडितहरू आतंकित बनेका छन्,’ ओलीले भने । 

ओलीले देशको अर्थतन्त्र नाजुक अवस्थामा पुगेको बताए । ‘निर्माण सम्पन्न आयोजनाको सरकारले भुक्तानी नदिँदा निर्माण व्यवसायीहरू बैंकको ऋण तिर्न नसकेर कालोसूचीमा परेका छन्,’ ओलीले भने ।